Bilantscha Emna da curs da rumantsch per famiglias

10 famiglias cun 24 uffants da la vegliadetgna da 2 fin 11 onns e 12 creschids èn sa participadas durant l’emna a Vignogn al champ da stad.

Malgrà che l’aura n’è betg adina stada la meglra, avain nus tuttina pudì organisar noss program tenor plan.

Las aventuras en il guaud, l’observaziun dals dams a l’ur dal vitg, la visita a  l’Alp Sez Ner per guardar co ch’i vegn fatg chaschiel e la tschertga dal cunigl Pauli èn stads accumpagnads da radis da sulegl. L’ensolver la damaun baud sin l’alp avain nus perfin pudì giudair giuadora.

Era la scola, las istorgias dal cunigl Pauli, las chanzuns, ils sauts ed ils gieus han fatg grond plaschair a pitschen e grond. E sa chapescha ha la cuschina da Martha e Susanne cun sias spaisas fitg variadas gustà excellentamain era quest onn.

Sco regurdientscha ha mintga uffant pudì prender a chasa in dc cun chanzuns registradas durant il champ. Il song principal dal champ: Tgi che sa rumantsch, quel sa dapli ch’ils uffants han chantà ferventamain mintga di, vegn registrà il november en il studio da RTR e cumpara alura sin la pagina da simsalabim e sin la pagina d’internet da la Lia Rumantscha.

Las fotografias dattan in’impressiun da las activitads durant il champ