Cunquai che la "scola" è primarmain ina domena dal Chantun e da las vischnancas, focusescha la Lia Rumantscha sias activitads sin in bun rom giuridic per las scolas rumantschas. Ella s’engascha per exempel per ils interess dals Rumantschs e las Rumantschas en connex cun la revisiun da la lescha da scola, las consequenzas da l'integraziun per la scola rumantscha e per l’instrucziun da rumantsch en ils gimnasis ed a l’universitad. Projects concrets fa la Lia Rumantscha mo là, nua ch'i manca la purschida resp. l'obligaziun. Perquai è la Lia Rumantscha s’engaschada per che la citad da Cuira porschia sezza ina scolina bilingua.

 

‘La scola rumantscha’ è strusch da definir; scolas rumantschas tradiziunals han autras cundiziuns ed autras sfidas che scolas bilinguas u scolas a l’ur dal territori rumantsch. La Lia Rumantscha emprova da sustegnair constructivamain las stentas individualas al lieu.

 

In'impurtanta activitad restan ils curs da rumantsch per Rumantschas e Rumantschs e per glieud d'autras linguas che la Lia Rumantscha organisescha sezza.