Newsdetails

Piripiri

Cuors d’integraziun sociolinguistica in Engiadin’Ota

 

Partecipaziun suprendenta e zuond allegraivla

 

Ad es cuntschaint ch’in Engiadin’Ota vivan e lavuran fich bgeras persunas da lingua portugaisa. Lur iffaunts chi frequaintan la scoula rumauntscha sun in püssas vschinaunchas üna buna pozza dal rumauntsch.

Per cha’ls creschieus possan sustgnair pü bain pussibel a lur iffaunts e ch’els as saintan eir meglder cò tar nus, vain spüert a Samedan ün cuors d’integraziun sociolinguistica. Quist vain sustgnieu dal chantun e dal circul d’Engiadin’Ota, organisatura es la Lia Rumauntscha.

Als 28 da schner ho cumanzo il cuors da 10 sairas.

Causa cha eiran preschaintas 17 persunas, traunter quellas perfin trais homens, es gnieu decis da mner il cuors in duos partiziuns.

Mnedra dal cuors es Flurina Plouda Lazzarini da Samedan, ella vain accumpagneda da Lurdes Clalüna, duonna portugaisa plainamaing integreda a Segl. Flurina Plouda Lazzarini ho elavuro ün concept chi cuntegna trais parts, nempe lingua, cultura ed ambiaint.

Il böt dal cuors es cha zieva las 10 sairedas sapchan fer ils partecipants üna simpla conversaziun in rumauntsch, ch’els hegian ün’ideja da l’istorgia dal rumauntsch, ch’els possan congualer lur cultura cun quella indigena e ch’els sapchan inua s’infurmer per dumandas administrativas e/u da scoula. A Flurina Plouda sto que a cour cha las partecipantas e’ls partecipants al cuors possan imprender a cugnuoscher la lingua e cultura rumauntscha da maniera attractiva cun musica, chaunt e gös e cha que detta ün barat da las duos culturas. Per quist motiv ho ella elavuro ün mez d’instrucziun tuottafat speciel.

enavos