Coaching, support ed infurmaziun linguistica
La Lia Rumantscha porscha servetschs d’infurmaziun linguistica e linguistic-culturala e sustegna ed accumpogna sin giavisch persunas privatas, firmas, instituziuns ed organisaziuns da far diever dal rumantsch. La Lia Rumantscha s’engascha ultra da quai da schlargiar permanentamain la rait da persunas cun bunas cumpetenzas linguisticas sin differents champs e d’abilitar uschia pli bleras persunas pussaivel da scriver e duvrar sezzas lur lingua.
Per sustegnair las Rumantschas ed ils Rumantschs e per infurmar tut las persunas interessadas, porscha la Lia Rumantscha ils suandants servetschs:
- Infurmaziun e lavur publica linguistica: respostas ad e-mails, telefons e brevs; referats; intervistas; curs e lavuratoris linguistics
- Scolaziun e perfecziunament da las cumpetenzas linguisticas da differentas gruppas professiunalas specificas sco chanzlistAs, redacturAs, etc. (en collavuraziun cun Furmaziun)
- Support e cussegliaziun linguistica a medias, chanzlias, organisaziuns, firmas e privats
- Support linguistic per projects da terzs (p.ex. project gruppa Viro/Surselva rumantscha, project Romontschissimo, artitgels rumantschs sin Wikipedia, paginas web vischnancas rumantschas)
- Posiziuns ed expertisas linguisticas
La Lia Rumantscha tgira contacts e tschertga la collavuraziun cun auters posts sumegliants sin nivel chantunal, naziunal ed internaziunal (barat d’experientschas, sinergias) e sa participescha en gruppas da lavur, sco per exempel la gruppa da lavur dal chantun per il project 'Lescha da linguas e vischnancas'.
