INFORUM - il forum da novitads davart il rumantsch
Cun INFORUM vul la Lia Rumantscha infurmar las medias davart novitads e novaziuns dal mund rumantsch. L’intent è da dar IN FORUM a products, projects, bilantschas e retschertgas davart il rumantsch.
___________________________________________________
7 da settember 2009
Scola bilingua a Cuira ha success
L’onn da scola 2009/10 han cumenzà 13 novs scolars l’emprima classa da la scola bilingua rumantsch/tudestg a Cuira. La scola bilingua vegn a partir da quest onn da scola manada en in status definitiv. Ella è in enritgiment per scolars, magisters e geniturs.
Diversas novas ediziuns rumantschas
Cun Il ravgialet vul la Lia Rumantscha porscher ad uffants tranter 9 e 13 onns in titel actual ed attractiv che tematisescha sentiments da ravgia, tema u la relaziun tranter fragliuns a moda divertenta ed interessanta.
Pauli grond - Pauli pitschen mussa ina da las numerusas aventuras dal pitschen cunigl Pauli. L'autura Brigitte Weninger tracta divers temas sco dir grazia, esser grond respectivmain esser pitschen.
Questa stad èn plinavant cumparids tschintg novs carnets rumantschs da l'Ovra svizra da lectura per la giuventetgna (OSL), dus novs meds da scola en rumantsch grischun ed in cudesch d’uffants da l’Uniun Rumantsch Grischun. >
LR e CCM s’engascha per la furmaziun da glieud giuvna
En fanadur 2009 han duas novas emprendistas da commerzi cumenzà lur emprendissadi tar la Lia Rumantscha (LR) a Cuira. I sa tracta da Bettina Casutt da Sagogn e da Ladina Halter da Vuorz. Era il Center da cumpetenza e managment per cultura, lingua e furmaziun (CCM) a Laax ha cun Lea Sgier ina nova emprendista da commerzi.
___________________________________________________
24 da mars 2009
Emprender rumantsch è in trend
Durant l’onn da scola 2007/08 han la Lia Rumantscha e la Scuntrada e formaziun Surselva organisà 88 curs da rumantsch cun totalmain 683 participantas e participants. Ils curs da tut ils 5 idioms plus rumantsch grischun han gì lieu en las differentas regiuns sco era a Cuira.
Era il TomTom ha emprendì rumantsch
As va il “Bitte sofort wenden!” da Voss sistem da navigaziun sin la gnerva? Empruvai damai da chattar la via cun agid d’ina vusch rumantscha. Armon Schlegel ha mussà a ses TomTom a discurrer rumantsch e quella vusch stat ussa a disposiziun a tuts.
Barat da cultura per emprender ad enconuscher il vischin
En il rom dal project "Museums & Scola" da Musesums Grischuns contribueschan las organisaziuns linguisticas grischunas (LR, Pro Grigioni Italiano, Walserverenigung Graubünden) sin iniziativa da la Lia Rumantscha in subproject: barat da cultura. Cun organisar visitas vicendaivlas intimescha il project las scolas participadas a "Museums & Scola" da far in barat da lingua e cultura.
Dapi sonda, ils 21 da mars 2009 è averta l’exposiziun “Ornamaints misterius” dal project "Museums & Scola" en il museum da la Claustra da Müstair.
Ulteriuras infurmaziuns datti qua: www.museenland-gr.ch
