La Lia Rumantscha en in´egliada
La Lia Rumantscha è l’organisaziun da tetg da tut las Rumantschas e tut ils Rumantschs. Ella vul promover a moda durabla la lingua e cultura rumantscha.
Il pli impurtant è che las Rumantschas ed ils Rumantschs da tut las generaziuns dovrian lur lingua uschè savens sco pussibel, la dettian vinavant a las proximas generaziuns e profiteschian a medem temp dad esser bilings e plurilings.
La Lia Rumantscha è vegnida fundada l’onn 1919 sco uniun da tetg da tut las uniuns rumantschas. Las uniuns affiliadas da la Lia Rumantscha èn uniuns regiunalas rumantschas dal Grischun, uniuns surregiunalas cun incumbensas spezialas ed uniuns rumantschas dad ordaifer il Grischun. Ils delegads da las uniuns affiliadas decidan ina giada l’onn a chaschun da la radunanza da delegads davart il budget ed il program da lavur da la Lia Rumantscha.
La centrala operativa da la Lia Rumantscha sa chatta a Cuira, ils biros regiunals a Zernez, Savognin, Ziràn e Laax. La Lia Rumantscha ha quatter partiziuns tematicas: Activitads Generalas, Linguistica Applitgada, Furmaziun, ed Art e Cultura. Ils Servetschs Centrals las sustegnan cun tut las lavurs administrativas.
En l’avegnir metta la Lia Rumantscha il focus sin las famiglias ed ils uffants, sin la politica da furmaziun sco era sin la promoziun da la bi- e plurilinguitad e da la convivenza tranter las diversas cuminanzas linguisticas en il chantun Grischun.
