Champs strategics
Champs d’activitad (model d’organisaziun)
Il model d’organisaziun sa cumpona da quatter process da basa (management, activitads generalas, process tematics, servetschs centrals) dividids en sis process principals:
fig. 1: model d’organisaziun
1. Management
Sut management è resumà la gestiun en il vast senn. Quai includa
- il management normativ (relaziuns cun partenaris d’interess, cultura da manaschi interna ed externa, visiun e finamiras a lunga vista etc.): lavur da la suprastanza e da la direcziun
- il management strategic (planisar ed inizialisar novs products, servetschs, projects etc.): lavur da la suprastanza e da la direcziun
- il management operativ (realisaziun da las activitads planisadas e da la lavur cuntinuanta): lavur da la direcziun e dals/da las collavuraturAs
2. Activitads Generalas
Cun las Activitads Generalas vul la Lia Rumantscha sensibilisar la populaziun en las regiuns rumantschas ed en la diaspora per la valur da la lingua e da la cultura rumantscha. Plinavant vul la Lia Rumantscha animar las Rumantschas ed ils Rumantschs da s’engaschar per lur lingua e cultura e per la convivenza activa tranter las differentas linguas en il Grischun.
Era las activitads ed ils programs dals centers regiunals cun la lavur cuntinuanta e lur collavuraziun cun las organisaziuns regiunalas è in accent da las Activitads Generalas.
3. Linguistica Applitgada
Cun la Linguistica Applitgada promova la Lia Rumantscha la lingua scritta e la lingua discurrida (rg ed idioms). La Linguistica Applitgada sviluppa novas terminologias e projects linguistics per il rumantsch, translatescha, lectorescha e cusseglia en dumondas linguisticas.
4. Furmaziun
La Furmaziun cusseglia e sustegna da la prescolina sur la scola populara fin a la furmaziun professiunala e da creschids en dumondas da la promoziun linguistica. In impurtant tema en quest connex è l'educaziun bi- e plurilingua. Sin la promoziun da quest sectur vul la Lia Rumantscha metter in accent spezial.
5. Art e Cultura
Art e Cultura cumpiglia tut las occurrenzas da la Lia Rumantscha che han ina tempra culturala. Ensemen cun ulteriurs partenaris porscha la Lia Rumantscha in program cultural per tut las regiuns rumantschas. Art e Cultura s'occupa ultra da quai da las valurs genuinas da la lingua e cultura che han in’influenza sin l'identitad rumantscha. Ediziuns per uffants e giuvenils e la cussegliaziun culturala cumpletteschan la purschida da questa partiziun.
6. Servetschs da support
Ils Servetschs da support fan la coordinaziun generala da la Lia Rumantscha. Dumondas da communicaziun, persunal, EED, organisaziun, dretg, contabilitad, administraziun etc. èn tematicas tgiradas dals Servetschs da support.
