Articolo - La Lia Rumantscha adattescha sias structuras operativas
En connex cun il nov curs strategic da la Lia Rumantscha, preschentà a la radunanza da delegad:as 2025, han la suprastanza e la direcziun examinà cuminaivlamain las structuras operativas. La finamira da l'analisa è stada da drizzar l'organisaziun a moda pli consequenta tenor sias finamiras strategicas e da garantir a medem temp che las cunvegnas da prestaziun cun la Confederaziun ed il Chantun Grischun vegnian ademplidas en in'auta qualitad.
Direcziun da trais persunas cun in parsura
En il rom dal svilup da l'organisaziun ha la suprastanza decidì da reorganisar la structura da direcziun da la Lia Rumantscha a moda fundamentala. En l'avegnir surpiglia ina direcziun da trais persunas enstagl da quatter la gestiun operativa e responsescha quella cuminaivlamain. L'anteriur vicesecretari general Andreas Gabriel daventa immediatamain il parsura e represchentant da la direcziun.
Las commembras ed ils commembers da la direcziun mainan las partiziuns «Lingua e Cultura», «Cuminanza ed Interess» e «Gestiun». Cun la nova structura da direcziun rinforza la Lia Rumantscha la collavuraziun
interdisciplinara e stgaffescha cleras responsabladads. A medem temp vegnan las vias da decisiun simplifitgadas ed ils accents strategics da l'organisaziun sustegnids a moda sistematica. Uschia po la Lia Rumantscha far frunt a las prerensiuns creschentas dals proxims onns a moda flexibla ed orientada a l'avegnir. En il rom da questa
reorganisaziun vegn la funcziun dal secretari general abolida.