Madleina Popesco-Marin - nossa ambassadura en Rumenia: Varga 40 onns ha la romanista e litterata Madleina Popescu-Marin, da Bucarest, nuau e tgirau stretgs contacts cun dils nos e dallas nossas e fatg l'interpreta ed ambassadura denter Rumenia ed il Grischun romontsch. Ella ha empriu sursilvan, scret surda nus e publicau els dus lungatgs parentai rumen e romontsch. Sias numerusas visetas e sentupadas tier nus han avischinau ella fetg. Biaras ovras da nos scribents e nossas scribentas ha ella translatau, ediu e presentau en Rumenia, punctuond adina puspei las semegliadetgnas denter las duas etnias neolatinas. Cun surdar il Premi dil Grischun 1999 ha la Regenza era renconuschiu ufficialmein siu engaschi extraordinari sco translatura ed en favur da lungatg e cultura romontscha en Rumenia. En sias "Regurdientschas", publicadas sco cudisch ton en rumen sco romontsch cul tetel " Il mund Romontsch en mia veta" lai Madleina Popescu-Marin passar revista tgi ch'ella ha tut entupau, tgei ch'ella ha interpriu per ed evenimentau tier nus. Bia bi eisi stau e presentau en in stil persunal e simpatic. Quei tut ei d'admirar en engrazievladad. (Giusep Capaul)