paragraf - Avais gust sin in café rumantsch virtual?
Avais gust sin in café rumantsch virtual?
Nus avain plaschair, sche vus essas da la partida. Il café stuais far sez, per ils buns discurs procura la Lia Rumantscha. Nus ans inscuntrain ina giada al mais durant l’enviern 2025 e discurrin e discussiunain davart ina tematica. Latiers bavain nus noss café e giudain 60 minutas rumantschas.
Tuttenina po l’entir mund sa participar al Café rumantsch virtual
Abitais Vus a Breil en Surselva, a Casti en il Grischun Central ubain a Brail en Engiadina Bassa? U essas Vus ina da bleras Rumantschas u in da blers Rumantschs che vivan giu la Bassa? U abitais Vus schizunt en Brasilia? Grazia al mund digital pudain nus tuttas e tuts ans inscuntrar sin in café e dar ina baterlada.
Il favrer, mars ed avrigl 2025 envida la Lia Rumantscha giasts che abitan a l’ester, e che han ina ferma colliaziun cun la patria e la lingua rumantscha. Ils cafés rumantschs virtuals èn interrumantschs – tut ils idioms èn represchentads e bainvegnids. Nus celebrain la varietad rumantscha.
Datas e giasts 2025
- 18-2-2025, 19.00 - 20.00: Cun il giast Robert Demont. Ses tat è emigrà davent da la Lumnezia a Londra en l’Engalterra.
La tematica vegn ad esser ses contact cun il rumantsch e sias ragischs.
- 11-3-2025, 19.00 - 20.00: Cun il giast Robin Arpagaus, che viva cun sia famiglia ad Enderby, Canada. Sia uffanza ha el passentà a Savognin ed è alura emigra cun sia dunna ed lur trais uffants a Enderby. Là mainan els in bain puril.
- 8-4-2025, 19.00 - 20.00: Cun il giast Madlaina Vallois-Crastan, che deriva da Sent. Dapi varga 30 onns viva ella dentant en Frantscha. L`amur la ha manà l`emprim a Paris ed oz en la vischinanza. Ella è tuttina adina puspè a Sent.
Attenziun: Ils plazs per ils Cafés rumantschs virtuals èn limitads. Spetgai pia anc da laschar or il café e s’annunziai l’emprim per ina da las occurrenzas. La colliaziun per As participar survegnis Vus per e-mail il di dal café rumantsch virtual suenter las 16.00.