Il tetel de quella raccolta de varga 60 historiettas legras-enzanua sper il humor e l'ironia-po gia annunziar il cuntegn da quei ch'igl autur ha priu verbalmein "giud la bucca dalla glieud", mo era tscheu e leu amplificau cun sia buna luna e gronda fantasia: In viadi atras nies mund, nossas relaziuns, ils discuors en famiglia ed en vischnaunca, quei che vegn relatau mo vi davos casa. Mo tut ha il davos la legria d'in bi matg fluras. Relaziuns da mintga di, mo tonaton buca cuminas. E co la veta sa esser biala, schegie che la tristezia laghegia magari vi davos las filistuccas neu e fa ghegnas.
La lavur digl autur ei buc vegnida construida per evocar reacziuns da quella u tschella specia. Igl ei la via la pli normala atras la veta, mo secapescha era la ponderaziun e la buna observaziun. El ha buc mo tedlau, mobein era udiu quella vusch dils furbazis, dils malizius, era dallas casualitads. Glieud sempla, mo savens era originala ed interessanta, empau differenta dils auters. Ins vesa immediat che Donat Cadruvi ha scret siu cudisch cun grond legherment.