Article - Lavuratori «Traversadas litteraras»
Lavuratori «Traversadas litteraras» 2025
Venderdi, ils 28 da november 2025, envidan la Lia Rumantscha e la Chasa da la translaziun Looren al proxim lavuratori «Traversadas litteraras». Il lavuratori sa deditgescha al lectorat da translaziuns ed al lectorat en general.
L'avantmezdi tegna Christoph Blum, lectur da la chasa editura Lenos a Basilea, in curt referat davart la via da la tscherna dal text fin a la publicaziun d'ina translaziun e discurra cun la translatura Irma Wehrli-Rudin. Las participantas ed ils participants vegnan a savair dapli da la collavuraziun tranter translatur:a e lectur:a respectivamain chasa editura e dals muments decisivs durant lectorar ina translaziun. Ils dus giasts raquintan da lur experientschas cuminaivlas e preschentan divers exempels da lur pratica da blers onns. Il suentermezdi lavuran las participantas ed ils participants cun exempels da texts concrets e discutan en la gruppa lur emprovas da lectorat.
Annunzia
Las «Traversadas litteraras» vegnan sustegnidas da la Fundaziun per la cultura Pro Helvetia e da la Fundaziun Oertli e sa drizzan a persunas activas sin il champ da la litteratura cun u senza experientscha da publitgar. L'annunzia è pussaivla fin ils 23 da november 2025 per e-mail a: gianna.cadonau@rumantsch.ch. Il lavuratori ed il gentar èn gratuits; ils custs da viadi surpiglian las participantas ed ils participants.
Preparaziun
In’emna avant il lavuratori survegnan las participantas ed ils participants intgins texts cun exempels da lectorats. Mintgin:a è supplitga:da da preparar quels tenor pussaivladad. Tgi che vul discutar en gruppa in lectorat d'in text translatà, saja quai en connex cun ina publicaziun actuala u ina pli veglia, po inoltrar sia proposta fin ils 3 da november a l’adressa dad e-mail suandanta: gianna.cadonau@rumantsch.ch.