Lavuratori «Traversadas litteraras» 2025 | Lia Rumantscha

Venderdi, il 28 da mars 2025, envidan la Lia Rumantscha e la Chasa da la translaziun Looren al tredeschavel lavuratori «Traversadas litteraras». L’occurrenza ha lieu en la chasa da cultura «Helferei» a Turitg.

Il lavuratori sa deditgescha a la translaziun da differents geners da texts. La Chasa Editura Rumantscha publitgescha questa primavaira il cudesch “Amur. Poesias 1648–2025, Liebesgedichte – Poesie d’amore – Poèmes d’amour”. L’antologia procurada dad Annetta Ganzoni e Bettina Vital cuntegna poesias da plirs tschientaners, en plirs idioms e pliras furmas liricas. Co ha la translatura Ruth Gantert chattà il dretg tun, la rima e l’atmosfera per questa varietad da texts? Durant l’avantmezdi lavura la gruppa ensemen cun la translatura vi d’intginas poesias. Il suentermezdi ans introducescha l’autura e reschissura Ivna Žic en sia moda da translatar in text scenic. Las participantas ed ils participants lavuran vi da differentas avischinaziuns a la translaziun dal text “Die Schutzbefohlenen” dad Elfriede Jelinek. 

Las «Traversadas litteraras» vegnan sustegnidas da la Fundaziun per la cultura Pro Helvetia e da la Fundaziun Oertli e sa drizzan a persunas activas sin il champ da la litteratura cun u senza experientscha da publitgar. L’annunzia è anc pussaivla fin ils 23 da mars 2025 per e-mail a: gianna.cadonau@rumantsch.ch. Il lavuratori ed il gentar èn gratuits; ils custs da viadi surpiglian las participantas ed ils participants.