paragraf - Lavuratori «Traversadas litteraras»
Lavuratori «Traversadas litteraras» 2026
La Lia Rumantscha e la Chasa da la translaziun Looren envidan venderdi, ils 27 da favrer 2026, al lavuratori Traversadas litteraras. Questa ediziun da las Traversadas litteraras ha lieu en collavuraziun cun il Festival «Schmolitz. LitteraturA Nairs» da la Fundaziun Nairs, l'Universitad da Genevra ed il Centre de la traduction littéraire de Lausanne. Il lavuratori sa deditgescha al barat tranter il rumantsch ed il franzos.
Il lavuratori biling ha lieu en la Maison Rousseau et Littérature a Genevra e sa drizza a translatur:as ed autur:as da lingua rumantscha e franzosa. La finamira dal workshop è da svegliar da nov l'interess per translaziuns dal rumantsch en franzos e da rinforzar e d'engrondir la rait d'actur:as sin il champ da la litteratura da questas duas linguas.
L'avantmezdi cumenza cun in'introducziun da Rico Valär en la litteratura rumantscha. Suenter raquinta Renzo Caduff da las colliaziuns tranter la litteratura rumantscha e franzosa. Il suentermezdi ha lieu in lavuratori cun Walter Rosselli ed Aline Delacrétaz che dattan in'invista en projects da translaziun actuals e gia realisads, preschentan meds d'agid pratics e lavuran cun las participantas ed ils participants vi d'exempels.
Annunzia e custs
Las Traversadas litteraras vegnan sustegnidas da la Fundaziun per la cultura Pro Helvetia e da la Fundaziun Oertli e sa drizzan a persunas activas sin il champ da la litteratura cun u senza experientscha da publitgar. L'annunzia è pussaivla fin ils 19 da favrer 2026 per e-mail a: gabriela.stoeckli@looren.net.
Il lavuratori ed il gentar èn gratuits; ils custs da viadi surpiglian las participantas ed ils participants. Per quatter participant:as cun in viadi pli lung stattan a disposiziun contribuziuns finanzialas per il viadi ed ev. in alloschi a Genevra. P.pl. contactar nus.
Festival «Schmolitz. LitteraturA Nairs»
Sut il motto «Schmolitz» sa deditgescha il festival dals 13 fin ils 15 da mars 2026 cumplettamain al barat litterar tranter la Svizra rumantscha e la Svizra franzosa. Previs è per exempel ina preschentaziun d'impressiuns e resultats da las Traversadas litteraras.