paragraf - Plima d'aur – Pledpierla
Plima d'aur – Pledpierla: La concurrenza da scriver per nossa lingua
La concurrenza da scriver per poetessas e fabulists ha lieu mintga dus onns en l’Engiadina, en la Val Müstair, en il Grischun Central ed en la Surselva, ed includa era las scolas bilinguas da Cuira, Domat e Trin. E l'onn 2025 envida la Lia Rumantscha puspè uffants, giuvenils e giuvens creschids da fabular.
La concurrenza «Plima d’aur / Pledpierla», realisada da la Lia Rumantscha, vul promover il plaschair da scriver texts rumantschs. A la concurrenza pon sa participar scolaras e scolars davent da 9 onns e giuvenils e creschids fin 25 onns.
Ils temas
Questa giada èn ils temas ils suandants:
> per scolaras e scolars da la 3. fin la 6avla classa: La clav magica
> per giuvenils davent da la scola superiura e giuvens creschids fin 25 onns: Mes planet fantastic
Ils premis
En mintga regiun vegnan ils texts valitads d’ina giuria. Ils megliers texts gudognan in premi en furma da daners e vegnan publitgads en differentas revistas, en chalenders ed en las medias rumantschas. Ina victura u in victur da mintga regiun dastga ultra da quai preschentar ses text a chaschun dals Dis da litteratura a Domat il november 2025.
Las modalitads
Poesia u paraula, fabla u ficziun: ins po realisar ils temas en tut ils geners da texts, en tut ils idioms ed en rumantsch grischun. Ins po scriver sulet:ta u en ina gruppa. E betg emblidar: curreger l' ortografia e la sintaxa. La premiaziun ha lieu mesemna, ils 4 da zercladur 2025.
Co e nua vegnan surdads ils premis? Quant lungs dastgan ils texts esser maximalmain? Co valitescha la giuria? Las respostas a quellas ed ad autras dumondas èn da chattar en quest document:
Inoltraziun
Ils texts pon vegnir inoltrads en furma digitala u sin palpiri per posta. L'ultim termin per inoltrar ils texts è ils 31 da mars 2025. Per plaschair inoltrar ils texts ensemen cun las persunalias als promoturs regiunals ed a la promotura regiunala da la Lia Rumantscha:
Surselva
Lia Rumantscha, Uolf Candrian, Städtli 18, 7130 Glion
uolf.candrian@rumantsch.ch
Engiadina
Lia Rumantscha, Men-Duri Ellemunter, Chasa du Parc, Via dals Bogns 161, 7550 Scuol
men-duri.ellemunter@rumantsch.ch
Grischun Central e scola bilingua Cuira
Lia Rumantscha, Simona Demarmels, Stradung 23, 7460 Savognin
simona.demarmels@rumantsch.ch
