paragraf - Contribuziuns finanzialas
© Mayk Wendt
Contribuziuns finanzialas
Nus sustegnain projects rumantschs cun contribuziuns finanzialas. Per quest intent impundain nus CHF 90’000.— ad onn. Ins po inoltrar projects culturals da tut las spartas artisticas da tempra interdisciplinara e socioculturala e dal sectur da la cultura populara. Plinavant sustegnain nus projects da lingua e da furmaziun.
Termins d’inoltraziun
Il project sto vegnir inoltrà almain quatter mais avant sia realisaziun ed uschia ch’ina menziun en tut las mesiras da communicaziun è anc pussaivla.
Exempels: cudesch avant la stampa, festival avant emprim stampat, dc avant stampa da booklet, ect.
Termins d'inoltraziun:
il 1. da favrer 20xx
il 1. da matg 20xx
il 1. d'avust 20xx
il 1. da november 20xx
Nus respundain entaifer quatter mais.
Igl è da resguardar ils criteris d’inoltraziun e d’exclusiun.
Exclusiuns
En il sectur cultural na sustegnain nus betg:
- represchentaziuns da cuntegns existents (p.ex. la represchentaziun da chanzuns rumantschas per chors)
- gaschas da bands rumantschas engaschadas da festivals
- prelecziuns dad auturas ed auturs rumantschs entaifer festivals
- programs da la stagiun da chasas da cultura
- custs da gestiun dad instituziuns culturalas
- translaziuns da tocs da teater
En il sectur da furmaziun na sustegnain nus betg:
- incumbensas dal maun public
- custs repetitivs
- lavurs da diplom e da matura
© Mayk Wendt
Criteris d’inoltraziun
La brev accumpagnanta sto vegnir inoltrada per rumantsch, il dossier da project cun preferenza per rumantsch. Il dossier duess cuntegnair ils suandants elements:
- brev accumpagnanta (sche pussaivel cun inditgar la contribuziun da sustegn en mira)
- descripziun curta dal project
- descripziun da l'aspect rumantsch dal project
- indicaziuns davart ils purtaders dal project / las persunas participadas
- plan da termins / ils lieus d'occurrenza
- budget ed il plan da finanziaziun cun indicaziun dal import giavischà da nus
- persuna da contact
- conto da pajament (IBAN)
Per projects culturals, socioculturals duai il dossier cuntegnair ulteriuramain:
- ina biografia curta da l'artista / da l'artist
- l'impurtanza dal project per la regiun, en la quala vegn realisà il project
- ina definiziun dal public en mira
- l'impurtanza dal project per il public en mira
Per projects da publicaziun è ulteriuramain giavischà in extract dal text.
Il reglament per contribuziuns finanzialas sco er ils projects che vegnan sustegnids actualmain chattais Vus qua:
Contact per inoltraziun
Lia Rumantscha, Via da la Plessur 47, CH-7001 Cuira