Cuminanza | Lia Rumantscha

Nus essan preschents en tut las regiuns rumantschas cun in team da promoturas e promoturs che sustegnan e cusseglian cun grond engaschi a favur d'in diever persistent dal rumantsch. La cuminanza rumantscha sco era la populaziun betg rumantscha vegn sensibilisada per in diever tut normal dal rumantsch en la vita quotidiana. Fatschentas, organisaziuns turisticas, economicas, culturalas ed ecclesiasticas ed uniuns en il territori rumantsch vegnan intimadas da duvrar il rumantsch cun persvasiun en lur communicaziun.  

Per cuntanscher quellas finamiras avain nus in stretg contact cun la populaziun, essan preschents a diversas fieras e martgads en tut las regiuns, organisain cafés rumantschs en differents lieus, intimain uffants e giuvenils da scriver texts rumantschs, motivain e cussegliain purtaders economics, turistics ed auters e sustegnain la politica en il diever dal rumantsch.