kidsfits per puter | Lia Rumantscha

04-01: Hoz es il Di da la scrittüra da Braille

Cura hest tü anniversari? Sest tü già ler la data da tieu anniversari? Ün anniversari important per bgers umauns chi nu saun ler culs ögls es l’anniversari da Louis Braille. El es naschieu ils 4 schner 1809. Pervi dad el es que il Di da la scrittüra da Braille, la scrittüra per persunas orvas.

11-02: Hoz es il Di dals amalos

Daspö il 1993 es ils 11 favrer il di per penser e güder als amalos. L’ideja per ün têl di ho gieu l’anteriur papa Gian Paul II cur ch’el d’eira svess üna vouta fich amalo.

15-02: Hoz es il Di dal verm da plövgia

Cucu … cò suni! Giò cò! Eau cuc be our da la terra cur cha plouva. Il sulagl nu d’heja gugent. Tü vezzast a me – ma eau nu vez a te – ed insomma nu vezzi ünguotta, eau sun nempe orv. Per la peja suni fich ferm. Eau sun bun d’uzer fin 60 voutas mieu egen pais. Scha tü paisast 25 kils, alura füss que scu scha tü füssast bun d’uzer 1’500 kils, dimena ün grand auto!

14-03: Hoz es il Di internaziunel da la matematica

A scoula imprendast tü cha matematica es innumbrer e fer quints. Per exaimpel plus e minus. I’l ram matematica imprendast tü eir ad imsürer ed a plazzer u disegner muosters, forsa perfin cun fuormas geometricas scu per exaimpel trianguls e quadrats. Matematica nu do que però be a scoula. Scha’s guarda bain, alura as vezza dapertuot matematica. Vezzast tü in tieu minchadi numers, cifras, muosters e fuormas?

23-03: Hoz es il Di internaziunel da la meteorologia

Perche do que ün Di internaziunel da la meteorologia? L’ora nu cugnuoscha üngüns cunfins traunter ils pajais. Perque es que important cha meteorologs e meteorologas da tuot il muond lavuran insembel. Per exaimpel pervi dals uricans: quists ciclons sun prievlus e scha las meteorologas ed ils meteorologs dad ün pajais saun cha do ün urican, averteschan els a lur collegas in oters pajais. Per ch’els possan lavurer bain insembel e baratter infurmaziuns, es gnida fundeda als 23 marz 1950 l’organisaziun ‹World Meteorological Organization›, l’organisaziun mundiela da la meteorologia. Ils 23 marz es l’anniversari da quist’organisaziun.

27-03: Hoz es il Di mundiel dal teater

Hest tü eir già udieu la frasa: «Schmetta da fer teater!»? Forsa cha tieus genituors u tia magistra haun dit que, cur cha tü hest fat da que cha nu’s vess da fer … Per exaimpel cur cha tü hest fat da clown! Ils 27 marz hest tü üna buna s-chüsa per fer teater scu cha tü voust. Tü poust dir: «Schi, hoz fatschi teater! Ils 27 marz es nempe il Di mundiel dal teater.»

23-04: Hoz es il Di mundiel dal cudesch

L’UNESCO ho declaro ils 23 avrigl scu Di mundiel dal cudesch. Perche güst quella data? Que ho da chefer cun üna tradiziun da la Catalogna, inua cha’s festagia quel di il di dal nom da San Georg/Göri, e que regaland ün a l’oter rösas e cudeschs.

30-04: Hoz es la Not dal barlot

Quist mais nu do que ün di speciel dimpersè üna not speciela! La not dals 30 avrigl süls prüms meg vain eir numneda «La not dal barlot». Pü bod as dschaiva cha las strias vegnan our quella not per suter e fer «barlot», dimena, rir, fer festa e striuner insembel.

17-05: Hoz es il Di mundiel da fer pastizeria e paun

Happybirthday tuorta d’anniversari! Hei, eir la tuorta d’anniversari ho ün egen di da festa u apunta ün egen di mundiel. Ils 17 meg es il Di mundiel dal fer pastizeria e paun.

08-06: Hoz es il Di dal mer

Nos planet, la terra, vain eir numno «il planet blov». Vis da dalöntsch, per exaimpel giò da la glüna, es nos planet per granda part blov – pervi dal mer. Sün nos muond es la pü granda part da la surfatscha cuvierta cun ova. Il mer es enorm important per nus umauns e per las bes-chas. Perque stu il mer gnir protet. Per fer attent a quecò, haun decis las Naziuns Unidas da festiver il Di internaziunel dal mer.

20-06: Hoz es il Di dals fügitivs

Hoz es il Di dals fügitivs, ün di per penser a tuot ils umauns chi haun stuvieu banduner lur patria per fügir da guerras, da violenza u da persecuziun.

08-08: Hoz es il Di dal giat

Quist di nun es pel giat! «Que es pel giat», as disch, scha qualchosa es per ünguotta. Ma il Di dal giat nun es insomma na per ünguotta! Ad es ün di aposta pels giats e per cha giaja bain cun els.

13-08: Hoz es il Di da las tschankinas e dals tschankins

Cun che maun scrivast tü? Cun chenün pittürast? E cun chenün vo que meglder da taglier? Cul dret u cul schnester? La granda part dals umauns fo quistas robas cul maun dret, ils bgers sun dimena dretners. Scha tü scrivast, pittürast, tagliast e büttast üna balla il pü gugent cul maun schnester, alura est tü tschankina u tschankin e quist di es specielmaing per te!

07/08-09: Ils Dis europeics dal patrimoni

Che as zoppa davous las portas ed ils mürs d’ün chastè? Chi ho construieu la tuor da crap e cu guard’la our a l’intern? Quaunt vegl es il viaduct e perche tegna el aunch’adüna? Chastels, tuors, viaducts e punts veglias ans pudessan quinter üna pruna istorgias dal passo – sch’els savessan discuorrer … Der la vusch a tels monumaints, a quistas perdüttas dal passo, que es l’ideja dals Dis europeics dal patrimoni.

15-09: Hoz es il Di internaziunel dal punct

Tuot ho cumanzo cul cudesch «The dot» – «Il punct» chi raquinta l’istorgia da la matta Vashti. Ella craja ch’ella nu sapcha disegner. «Cumainza simplamaing cun ün punct», disch sia magistra. Vashti fo quelò e pittüra simplamaing ün punct immez il fögl.

21-09: Hoz es il Di da la pêsch

Cu fest tü la pêsch? Forsa cun der il maun e dir: «Fainsa pêsch»? Al Di da la pêsch, als 21 settember, dessan tuots glivrer da cumbatter l’ün cunter l’oter. Las armas stuvessan insè taschair quel di.

06-10: Hoz es il Di dal surrir

Cugnuoschast tü il smiley? Tü hest sgür già vis la simpla vista melna chi surria. Forsa hest tü vis il smiley sün ün tacharöl, forsa sül telefonin u forsa hest ün etui u oter materiel da scoula u scoulina cun sü il smiley. Il pled «smiley» vain dal inglais. «Smile!» voul dir «surria!».

07-10: Hoz es il Di dal bambesch

Il bambesch es üna plaunta fich speciela. Vi da sieus ramins port’la ballinas alvas scu vatta. Que es eir il materiel cha’s nomna bambesch, per tudas-ch «Baumwolle». Cul bambesch as po fer bgeras bellas chosas. Guardè intuorn: t-shirts, stinvs, süjaintamauns, roba da let, uorsins da plüsch – tuot que e bgeras otras chosas sun fattas da bambesch.

10-10: Hoz es il Di mundiel dal chaun

Cò vain il di per Lupo! Al Di mundiel dal chaun dessan ils umauns dir grazcha als chauns per tuot que ch’els faun per els. E Lupo ans fo bain buna glüna. Per que ho el merito üna liangia. U forsa eir duos.

09-11: Hoz es il Di da las inventedras e dals inventeders

Chi ho insè invento ils ogets cha nus druvains mincha di? Chi ho invento il telefonin, il pairin eletric, il velo, la fras-chera, il palperi u las jeans. Bgeras da quistas robas nu sun stedas cò dad ün di a l’oter. Qualchün ho il prüm stuvieu avair l’ideja e zambrager prümas versiuns dals ogets.

20-11: Hoz es il Di dals drets da l'iffaunt

Che culur haun tieus chavels? Che culur ho tia pel? Est tü grand u pitschen? Sest cuorrer scu ün leopard u tschaintast aint il s-chabè cun roudas? Est tü ün mat u üna matta? Tuot quistas differenzas nu giouvan üngüna rolla.

11-12: Hoz es il Di internaziunel da la muntagna

Savais vus cha do ün di speciel aposta per nossas muntagnas? El ans dess güder a tgnair adimmaint cha las muntagnas sun fich importantas per nos planet. Las muntagnas majestusas nu sun be fich bellas per guarder, ellas sun eir nüzzaivlas ed importantas per nos sistem ecologic.