Articolo - Markus Solinger banduna la Lia Rumantscha
Markus Solinger è entrà en uffizi sco secretari general l’avust 2023. En stretga collavuraziun cun la suprastanza, la direcziun e la squadra da la Lia Rumantscha ha el contribuì fermamain a l’elavuraziun da la nova orientaziun strategica da l’organisaziun. Però en vista ad imaginaziuns divergentas co realisar la strategia e co cuntinuar a sviluppar l’organisaziun vegn l’engaschament da Markus Solinger terminà.
Durant ses temp d'uffizi èn vegnidas stgaffidas basas impurtantas per l'orientaziun futura da la Lia Rumantscha. In accent spezial da sia activitad è stà il rinforzament da las prestaziuns da basa en ils secturs da la lingua e da la furmaziun. Ultra da quai ha Markus Solinger fatg avanzar decisivamain la transfurmaziun digitala da l'organisaziun. Uschia ha la Lia Rumantscha publitgà l'onn passà sia strategia per la transfurmaziun digitala. Quella pussibilitescha ina collavuraziun structurada da tut las instituziuns che s'engaschan en il sectur digital per la lingua rumantscha.
La suprastanza sut il presidi dad Urezza Famos engrazia a Markus Solinger per ses grond engaschi e giavischa ad el tut il bun per ses proxims pass professiunals. El vegn a bandunar l’organisaziun ils proxims dis. Suenter las davosas surdadas surpiglia la direcziun la responsabladad per las fatschentas operativas.