Articolo - Armon e Stina – Pledari pitschen
Nov dicziunari illustrà da la Lia Rumantscha
La Lia Rumantscha sa legra da preschentar in nov dicziunari illustrà: «Armon e Stina – Pledari pitschen/Kleines Wörterbuch». Il dicziunari duai animar uffants e creschids da duvrar il rumantsch cun gust e plaschair. Il Pledari pitschen è vegnì realisà en stretga collavuraziun cun l’illustratura Cilgia Zangger e la graficra Theres Jörger e cumpara en trais variantas linguisticas cun mintgamai dus idioms e tudestg en in’ediziun.
1000 pleds, 114 paginas, 2 fragliuns
Il nov dicziunari illustrà «Armon e Stina – Pledari pitschen/Kleines Wörterbuch», in’ediziun originala da la Lia Rumantscha, preschenta sin 114 paginas var 1000 pleds dal mintgadi en munds tematics plain colur ed avra la porta a cuntradas da maletgs e da pleds fascinantas. En il center stattan ils dus fragliuns Armon e Stina cun lur famiglia che accumpognan las lecturas ed ils lecturs tras lur vita da mintgadi: da la damaun marvegl en lur dachasa cotschen rosa fin a l’excursiun en la citad gronda cun la ramur fascinanta da motorettas e helicopters e la visita en l’ospital, dal lung viadi da vacanzas sper la mar fin a la visita dal circus cun spidafieu, ballerin e popcorn, da la festa da famiglia allegra fin al sguard fascinant en il tschiel stailì.
Il policist e la palutta, il regal e la rauna, il fieu e la flauta: pleds èn bler dapli ch’ina successiun da bustabs, els èn colliads cun maletgs, emoziuns ed experientschas. Il Pledari pitschen envida d’explorar il mintgadi ensemen cun ils dus uffants Armon e Stina. El duai svegliar il plaschair da scuvrir ed animar da s’approfundar cun gust en il mund dals pleds rumantschs. L’illustratura rumantscha Cilgia Zangger, sesenta a Lucerna, ha dissegnà e colurà cun gronda creativitad, bler umor ed amur per detagls ils munds tematics dad Armon e Stina e la graficra rumantscha Theres Jörger, sesenta a Sagogn, ha procurà per la concepziun moderna e frestga dal cudesch.
Per uffants pitschens e pli gronds
La Lia Rumantscha edescha cun il nov dicziunari illustrà in mund da pleds e maletgs divers e modern che correspunda a la realitad dals uffants che vivan qua, senza stereotips e rollas cementadas. Il dicziunari illustrà è adattà perfetgamain per uffants pitschens e pli gronds, ma era per creschids che vulan sa famigliarisar cun la lingua rumantscha. A tuts, pia pitschen e gronda, porscha el in access attractiv e ludic a la lingua ed animescha uschia da sfegliar, da scuvrir e d’emprender. Tranter las paginas illustradas è mintgamai inserida ina pagina melna pli curta che preschenta ils pleds en la successiun da las illustraziuns.