Pli baul eis ei stau en mintga cass aschia - ch'ins ei ius atras las vals dad ir da Cavorgia a Sedrun.
In tschancun d'ina mesuretta giu per ina via deserta e macorta, scalprada viaden els platters che pendan bunamein perpendiculars viers ils funs dalla val. Las auas egl iral vegnan, ramuran e secavan afuns e las buolas fan endamen. A pèr cun la scarpa sefetgan ils pégns si per las plauncas ed ils stretgs da Claus e Clis (che senumnan è veramein aschia) muentan damondas, cunzun cura ch'igl ei serrau notg e la cauracorn dat is. Aunc autras vuschs ein vegnidas neutier e visiuns ein sefatgas, ferton che jeu vai entschiet a tener stagn las scartiras el sac dadens dil tschiep. Ella ha adina fatg cun la buna, la notg, ed jeu vai tratg profundamein flad.
In toc via che jeu enconuschel da rudien ed jeu sun adina sedaus d'enconuscher. E che jeu metti nuotatonmeins d'ina vart; ver eis ei che jeu vai vuliu mitschar dils claus e dils clis per veser en e dar decisiuns. Ordeifer ils logs vai jeu schau siglir las larmas d'anflar la via.