Artikel - Radunanza da delegadas e delegads da la Lia Rumantscha
Radunanza da delegadas e delegads da la Lia Rumantscha
La radunanza da delegadas e delegads da la Lia Rumantscha ha lieu quest onn ils 20 da zercladur a Samedan. Durant la radunanza elegian las delegadas ed ils delegads il nov presidi da la Lia Rumantscha. Ellas ed els pon tscherner tranter duas opziuns.
Elecziun dal presidi
Per il presidi candidescha Chasper Sarott. El ha lavurà sco diplomat ed ambassadur en differents pajais sco il Libanon u la Pologna. Dapi l'onn passà è Chasper Sarott vicedirectur e schef dal persunal dal Departament federal d'affars exteriurs (DFAE).
En pli candideschan per il co-presidi la co-presidenta actuala da la Lia Rumantscha, Urezza Famos, ensemen cun Bernard Maissen. Urezza Famos è en uffizi dapi l'onn 2022. Ella ha presidià l'organisaziun ensemen cun Gianna Luzio che ha demissiunà l'onn passà suenter sia elecziun sco nova directura da l'Uffizi federal da communicaziun. Urezza Famos è cussegliadra d'interpresas e da cultura, sco er editura.
Ses cuncandidat Bernard Maissen è stà directur da l'Uffizi federal da communicaziun fin il mars 2026. Plinavant è el stà schefredactur da Radiotelevisiun Svizra Rumantscha (RTR) e da l'Agentura telegrafica svizra (ATS/SDA).
Midadas en la suprastanza
Ultra dal presidi elegia la radunanza da delegadas e delegads er in nov suprastant. L'Uniun Rumantscha Grischun Central (URGC) propona Leo Thomann sco ses represchentant e sco successur da Patric Vincenz en la suprastanza da la Lia Rumantscha. Leo Thomann è selvicultur pensiunà, anteriur president da la vischnanca da Surses e president actual da l'Uniun rumantscha da Surmeir (URS).