Article - Lavuratori «Scriver litterar»
Lavuratori «Scriver litterar»
Nus purschain a partir dal schaner 2025 in lavuratori «Scriver litterar» per autur*as rumantsch*as, l’emprima purschida
da furmaziun e da perfecziunament per scriver texts litterars en rumantsch. La purschida pussibilitescha
als*las participant*as da chattar e precisar lur agen scriver litterar.
La purschida vegn sustegnida finanzialmain e concepziunalmain da la Fundaziun svizra per la cultura Pro Helvetia. Ulteriuras fundaziuns
ed instituziuns sustegnan il project finanzialmain, conceptualmain ed idealmain:
Fundaziun Ernst Göhner, Pro Litteris, Banca Chantunala Grischuna, Fundaziun Oertli, Fundaziun Studer/Ganz, Fundaziun Binding, Uniun per la Litteratura Rumantscha, A*dS Autur*as da la Svizra
Per tgi?
La purschida sa drizza a persunas rumantschas che han gia fatg emprimas experientschas da scriver texts litterars e che vulan approfundar quellas.
La furmaziun è er adattada per persunas che scrivan gia professiunalmain en auters champs e vulessan sviluppar vinavant lur abilitads.
Persunas entusiasmadas da la litteratura che vulessan scuvrir vias novas cun scriver èn era bainvegnidas – independentamain da la vegliadetgna, da la furmaziun e da l'idiom.
Il lavuratori è in'ufficina da scriver che dat in spazi per emprender, barattar experientschas, scriver e discutar texts.
Ils*las participant*as duain lavurar durant il lavuratori vi d'in agen project litterar.
Cuntegn e durada
Il lavuratori cuntegna quatter moduls che permettan d'emprender d'enconuscher differents geners da texts e d'experimentar cun quels:
Il modul «Experiment», il modul «Prosa», il modul «Scriver texts scenics», il modul «Lirica» ed il modul«Scriver e publitgar texts plurilings».
En pli porscha il lavuratori ina survista da l'uschenumnà canon litterar rumantsch.
Suenter avair frequentà questa part tematica approfundeschan ils*las participant*as cun sustegn da la gruppa e da mentur*as lur projects litterars individuals.
Il lavuratori cumpiglia bundant 30 sondas ed in tschert temp da lavur vi dals projects litterars individuals ils onns 2025 e 2026.
Las vacanzas da scola vegnan resguardadas uschè bain sco pussaivel.
Annunzia
L'annunzia è pussaivla a partir dal 1. da settember enfin la fin da november 2024.
As annunziai p. pl. cun ils sequents documents:
• brev da motivaziun/d'annunzia
• emprova da scriver (prosa 6'000 – 10'000 battidas, incl. vidas/lirica 5–10 poesias)
• curta biografia che raquinta da Vossas experientschas litteraras
(tut ils idioms e rumantsch grischun èn bainvegnids)
Suenter Voss'annunzia faschain nus in discurs d'admissiun per empreder d'enconuscher Vus e discutar Voss interess litterars.
Tramettai p. pl. Voss'annunzia a partir dal 1. da settember per e-mail a Gianna Cadonau (adressa e-mail sutvart) u per posta a:
Lia Rumantscha, Lavuratori «Scriver litterar», Via da la Plessur 47, 7001 Cuira
Custs
Custs da semester: CHF 625.- / CHF 500.- (per student*as)
Inclus èn 3 h da mentorat individual per participant*a ed il material da curs.
Custs totals lavuratori «Scriver litterar»: CHF 2'500.- / 2’000.- (per student*as)
Lieu
Il lavuratori ha lieu en las localitads da la Lia Rumantscha a Cuira.
Ina participaziun a distanza n'è betg giavischada, dentant da princip pussaivla. Sch'ina preschientscha fisica n'è betg pussaivla per Vus,
menziunai quai p. pl. en Voss'annunzia. Durant il discurs d'admissiun vegnin nus a discutar sco proceder.