Lavuratori «Scriver litterar» | Lia Rumantscha

Artikel - Lavuratori «Scriver litterar»

Lavuratori «Scriver litterar»

Nus purschain a partir dal schaner 2025 in lavuratori «Scriver litterar» per auturas ed auturs rumantschs, l’emprima purschida da furmaziun e da perfecziunament per scriver texts litterars en rumantsch. La purschida pussibilitescha a las participantas ed als participants da chattar e precisar lur agen scriver litterar.

La purschida vegn sustegnida finanzialmain e concepziunalmain da la Fundaziun svizra per la cultura Pro Helvetia.


Per tgi?

La purschida sa drizza a persunas rumantschas che han gia fatg emprimas experientschas da scriver texts litterars e che vulan approfundar quellas. La furmaziun è er adattada per persunas che scrivan gia professiunalmain en auters champs e vulessan sviluppar vinavant lur abilitads. Persunas entusiasmadas da la litteratura che vulessan scuvrir vias novas cun scriver èn era bainvegnidas – independentamain da la vegliadetgna, da la furmaziun e da l'idiom.
 

Cuntegn e durada

Planisads èn tschintg moduls tematics che dattan ina survista da l'uschenumnà canon litterar rumantsch e sa concentreschan sin il mastergn dal scriver. Suenter avair frequentà questa part tematica approfundeschan las participantas ed ils participants cun sustegn da la gruppa e da menturas u menturs lur projects litterars individuals.
Il lavuratori cumpiglia bundant 30 sondas ed in tschert temp da lavur vi dals projects litterars individuals ils onns 2025 e 2026. Las vacanzas da scola vegnan resguardadas uschè bain sco pussaivel.
La planisaziun è provisorica. La descripziun exacta dals cuntegn segua en settember 2024. 
 

semester (schaner – fanadur 2025)

Plenum: introducziun, tut ils e las docent*as
Canon rumantsch: introducziun, Rico Valär
Modul «Experiment», concepì da Flurina Badel cun docent*as da giast (duas sondas)
Canon rumantsch: prosa, Rico Valär
Modul «Prosa», Leo Tuor e docent*a da giast (quatter sondas)


semester (settember – december 2025)

Modul «Scriver texts scenics» cun Selina Beghetto en collavuraziun cun Jürg Gautschi (trais sondas)
Canon rumantsch: lirica, Rico Valär
Modul «Lirica», Dumenic Andry e docent*a da giasts (trais sondas)
Canon rumantsch: analisa e discussiun da singulas ovras, Rico Valär


semester (schaner – fanadur 2026)

Modul «Scriver e publitgar texts plurilings», Vincenzo Todisco e docent*a da giasts (trais sondas)
Plenum: preschentaziun da texts en la gruppa, docent*as
Plenum: project litterar individual, docent*as


semester (settember – december 2026)

Plenum: vista externa e discussiun dals texts, gruppa, docent*as ed expert*as extern*as
Plenum: reflexiun vista externa e discussiun dals texts, gruppa
Plenum: mund da litteratura, A*dS Auturas ed auturs da la Svizra
Finiziun e preschentaziun publica dals texts


Survista dals termins     

A partir dal settember 2024 vegnan ad esser publitgads l’andament ed ils criteris per l’admissiun al lavuratori ed ina descripziun detagliada dals cuntegns dals moduls. 
L’annunzia è pussaivla da cumenzament da settember fin la fin da november 2024.


Custs

Custs da semester: CHF 625.- 
Inclus èn 3 h da mentorat individual per participant*a ed il material da curs.
Custs totals lavuratori  «Scriver litterar»:  CHF 2 500.-

 

Lieu 

Il lavuratori ha lieu en las localitads da la Lia Rumantscha a Cuira.
 

Contact

Per dumondas stat a disposiziun Gianna Olinda Cadonau, manadra Cultura: