Lavuratori «Scriver litterar» | Lia Rumantscha

Article - Lavuratori «Scriver litterar»

Nov lavuratori «Scriver litterar»

Per scriventas e scrivents rumantschs datti bainbaud ina purschida cumplessiva per emprender ed approfundar l'art da scriver texts litterars. Enfin ussa datti ina tala pussaivladad mo en las autras linguas naziunalas e betg en rumantsch. Ina realitad che la Lia Rumantscha vul midar cun porscher in tal curs a partir da l’onn 2025 er en rumantsch. Il lavuratori «Scriver litterar» è ina purschida da furmaziun e da perfecziunament per auturas ed auturs rumantschs. Ella pussibilitescha a las participantas ed als participants da chattar e precisar lur agen scriver litterar. La purschida sa drizza a persunas rumantschas che han gia fatg emprimas experientschas da scriver texts litterars e che vulan approfundar quellas. La furmaziun è er adattada per persunas che scrivan gia professiunalmain en auters champs e vulessan sviluppar vinavant lur abilitads. Persunas entusiasmadas da la litteratura che vulessan scuvrir vias novas cun scriver èn era bainvegnidas – independentamain da la vegliadetgna, da la furmaziun e da l'idiom.

Tschintg moduls tematics    
Planisads èn tschintg moduls tematics che dattan ina survista da l'uschenumnà canon litterar rumantsch e sa concentreschan sin il mastergn dal scriver. Suenter avair frequentà questa part tematica approfundeschan las participantas ed ils participants cun sustegn da la gruppa e da menturas u menturs lur projects litterars individuals.

Ils moduls tematics vegnan manads da docentas e docents versads. L’emprim modul «Experiment» vegn concepì da l’autura ed artista Flurina Badel, il modul «Prosa» vegn manà da l’autur Leo Tuor, il modul «Scriver texts scenics» da la dramaturga Selina Beghetto ensemen cun  l’autur e pedagog da teater Jürg Gautschi, la «Lirica» maina il poet Dumenic Andry ed il modul «Scriver e publitgar texts plurilings» l’autur e professer per didactica da plurilinguitad integrada a la Scola auta da pedagogia dal Grischun, Vincenzo Todisco. Docentas e docents envidads vegnan a cumplettar il team. Il professer per litteratura e cultura rumantscha a l’Universitad da Turitg Rico Valär maina la part dal «Canon rumantsch». 
Il lavuratori è vegnì concepì da Flurina Badel e Gianna Olinda Cadonau, responsabla per la promoziun da cultura. Questa purschida da la Lia Rumantscha vegn sustegnida finanzialmain e concepziunalmain da la Fundaziun svizra per la cultura Pro Helvetia.

Survista dals termins     
A partir dal settember 2024 pon ins s’annunziar per il lavuratori da quatter semesters che cumenza il schaner 2025, cumpiglia bundant 30 sondas ed in tschert temp da lavur vi dals projects litterars individuals ils onns 2025 e 2026. Las vacanzas da scola vegnan resguardadas uschè bain sco pussaivel. Infurmaziuns davart la purschida èn da chattar sin www.liarumantscha.ch. A partir dal settember 2024 vegnan ad esser publitgads l’andament ed ils criteris per l’admissiun al lavuratori ed ina descripziun detagliada dals cuntegns dals moduls. 
Tgi che vul gia ussa savair dapli davart la purschida po sa drizzar a la Lia Rumantscha. 

Dal reminent: Glindesdi, ils 6 da matg 2024 a las 19.00, ha lieu ina sairada litterara cun Gianna Olinda Cadonau e Flurina Badel en la Kulturgarage OKRO, Tittwiesenstrasse 21, a Cuira. Ellas preschentan en in dialog litterar la nova purschida da la Lia Rumantscha reflectond lur agen scriver litterar