Article - Midadas en il presidi e la suprastanza da la Lia Rumantscha
Midadas en il presidi e la suprastanza da la Lia Rumantscha
En consequenza da sia elecziun sco nova directura da l’Uffizi federal da communicaziun (UFCOM) sa retira Gianna Luzio cun vigur immediata dal copresidi da la Lia Rumantscha. La suprastanza gratulescha a Gianna Luzio per sia nova incumbensa ed engrazia cordialmain per ses grond engaschi e ses merits per la lingua e cultura rumantscha. La suprastanza ha exprimì la confidenza a la copresidenta Urezza Famos che maina suletta il presidi enfin l’elecziun cumplementara l’onn proxim.
Tenor la pratica vertenta ha il Departament federal per ambient, traffic, energia e communicaziun (DATEC) constatà che la nova funcziun da Gianna Luzio sco directura designada da l'Uffizi federal da communicaziun n'è betg cumpatibla cun ses uffizi tar la Lia Rumantscha. Per instradar la successiun ha la suprastanza installà ina cumissiun da tscherna. Quella prepara las elecziuns substitutivas a chaschun da la proxima radunanza da delegadas e delegads dals 20 da zercladur 2026. La suprastanza ha exprimì la confidenza ad Urezza Famos da manar suletta il presidi da la Lia Rumantscha en il fratemp. En vista a las elecziuns substitutivas amez il temp d’uffizi dal trienni 2025-2027 ha il vicepresident Patric Vincenz annunzià a temp da vulair remetter ses uffizi a quel termin.
Nominaziun d'ina cumissiun da tscherna
Per preparar l'elecziun substitutiva installescha la suprastanza da la Lia Rumantscha ina cumissiun da tscherna che sa cumpona da suprastantas e suprastants da la LR. La cumissiun vegn ad agir sut la direcziun da Toni Vinzens e sa cumpona plinavant da Gianna Duschletta e Lars Prevost. Enfin la fin da l'onn 2025 vegn la cumissiun ad elavurar ils profils d'exigenza ed in urari per la procedura electorala. L’entschatta da schaner 2026 orientescha ella davart l'ulteriur proceder.
Sustegn dal cussegl per ils proxims pass
Il cussegl, la radunanza da las presidentas e dals presidents da las uniuns affiliadas, è vegnì infurmà e consultà en sia seduta dals 2 d'october davart las preparativas per las elecziuns substitutivas dal zercladur 2026. La suprastanza ha plinavant orientà che Gianna Luzio stat a disposiziun ils proxims mais per accumpagnar singuls projects strategics ch’èn gia instradads. Quai succeda sin giavisch da la suprastanza e senza indemnisaziun. La suprastanza engrazia cordialmain a Gianna Luzio per ses grond engaschament per la lingua e cultura rumantscha.