Ins ha dumandau Gion Barlac sch'el lessi cantar il laud e la gloria dalla schlatta feminina sursilvana. Secapescha ch'el ha buca fatg dir duas gadas. Mo strusch ch'el ha giu intunau la canzun ha le fatg persenn che la melodia seigi nuota maneivla. Bein ei Gion Barlac in SUrsilvan da tschep, naschius e carschius si en la tiara ed enconuscha in triep femnas, dunnas e mattas sursilvanas. Mo propi pli datier dil pegl, gliez ha num vus! A letg eis el staus ton sco el seregorda mo cun ina Sursilvana. Gliez era la tatta. Cu el fuva in buobatsch e vess atgnamein buca giu da far pli en las caultschas, fageva el aunc tuttina mintgaton. Lu seturpegiava el avon la mumma e sias soras e fugeva tier la tatta. Lezza prendeva ora la buora, lavava l'entira pustracca e metteva Gion Barlac cun tgil blut en sia bissacca da strom. Cu ella vegneva lu era lien fuva quei cauld e bien en in igniv da clutschas.