Articolo - «ALAS» – in nov sistem da translaziun per tut ils idioms e RG
«ALAS» – in nov sistem da translaziun per tut ils idioms e RG
«ALAS» è ina maschina da translatar a basa dad intelligenza artifiziala che sustegna la translaziun tranter il rumantsch ed il tudestg. Il nov program sa distingua tras la pussaivladad da betg mo pudair far translaziuns en rumantsch grischun, mabain er en tut ils tschintg idioms rumantschs. E quai cun ina qualitad che correspunda al nivel da la tecnologia dad oz. «ALAS» è disponibel a partir dad immediat gratuitamain e senza procedura d’annunzia per tuttas e tuts sut:
«ALAS» è il resultat dad in project che la Lia Rumantscha ha lantschà l’avrigl 2025 e che sa basa sin ina stretga collavuraziun cun l’Institut da Linguistica Computaziunala da l’Universitad da Turitg. La Fundaziun Patrimoni Cultural RTR ha contribuì essenzialmain a la finanziaziun da quest project.
Per stgaffir translaziuns da referenza necessarias per sviluppar «ALAS» e per testar emprims prototips, han 27 persunas che represchentan differentas professiuns e che lavuran mintga di cun la lingua – sco per exempel translatur:as, scolast:as u chanzlist:as – prestà 1’200 uras da lavur. Las datas per trenar il sistem èn vegnidas furnidas da differents partenaris ed ils giavischs e las cundiziuns da quels furniturs areguard la proprietad intellectuala èn vegnids resguardads cumplettamain durant l’entir process.