Promoziun culturala | Lia Rumantscha

Nus promovain il rumantsch en la cultura populara sco era projects da cultura professiunals cun in aspect rumantsch. Quai faschain nus cun differents instruments da promoziun. Nus cussegliain projects culturals da tut las spartas artisticas sco era projects interdisciplinars e socioculturals en dumondas da producziun, finanziaziun e communicaziun. Ensemen cun partenaris realisain nus atgnas purschidas culturalas. Ultra da quai s'occupain nus da las valurs genuinas da la lingua e cultura che han in’influenza sin l'identitad rumantscha.

Nus edin almain duas ediziuns per uffants ad onn. Questas ediziuns da licenza cumparan mintgamai en tut ils idioms ed en rumantsch grischun. Uffants che creschan si per rumantsch u biling, che frequentan ina scola rumantscha u bilingua u che emprendan rumantsch dovran lectura en lur idiom. Nus n’edin nagins manuscrits originals. Nus infurmain e cussegliain auturas ed auturs rumantschs che vulan publitgar lur manuscrit.