Digitalisaziun | Lia Rumantscha

Nus vulain sustegnair la transfurmaziun digitala e trair a niz quella. Quai capita cun atgnas purschidas sco il Pledari Grond ed en collavuraziun cun partenaris, p.ex. per sviluppar programs che controlleschan l’ortografia da texts. Nus mettain  a disposiziun atgnas datas digitalas e purschain cussegliaziun linguistica per projects digitals. Cun digitalisaziun.ch administrain nus ina plattafurma publica per parter iniziativas e products che promovan la transfurmaziun digitala. 

En il rom dal project «Programs da correctura ortografica rumantscha» avain nus ensemen cun la Pro Svizra Rumantscha creà novs «spellcheckers». In «spellchecker» è in program che gida a controllar l’ortografia da texts scrits cun il computer.

Enfin uss èn vegnids rendids accessibels il program da correctura per il puter, il rumantsch grischun, il surmiran, il sutsilvan ed il vallader. La publicaziun da la versiun sursilvana è previsa per la stad 2024. Las tschintg variantas publitgadas pon ins gia duvrar cun macOS, Mozilla Firefox, LibreOffice, Mozilla Thunderbird, Adobe InDesign ed era Microsoft Word.

In'ulteriura pussaivladad è dad utilisar il program da correctura en il navigatur. Quai va via il Pledari Grond sin www.pledarigrond.ch. Sper la versiun online dal program da correctura cuntegna la pagina er instrucziuns co installar il program en Word ed en ulteriurs programs. Pleds ch’il «spellchecker» n’enconuscha anc betg, pon ins annunziar directamain via il formular online. Igl è previs dad actualisar cuntinuadamain la banca da datas davos il program da correctura.