Tiago, ün giuven Portugais chi's sainta minchatant ün pa sulet, as lascha guidar d'üna coquiglia misteriusa chi til maina fin in Engiadina. Là inscuntra'l ad Aita, üna figlia da paur. Els s'inamuran e decidan da's maridar. Tiago tuorna cun sia giuvna duonna in Portugal in lur finca. Ma la furtüna para da tour üna fin. Aita as lascha vieplü increscher da sias muntognas cullas chapütschas albas. Che mâ esa be da tour a man? Per furtüna chi dà eir illas tarablas duonnas sabias! Id es darcheu la coquiglia chi maina a Tiago pro üna da quellas duonnas. E propcha; ella ha ün'idea... Preschantaziun dal cudesch Dürant sias vacanzas in Portugal ha dudi Peter Horber da sia guida da viadi, co cha'ls bös-chs da mandels sun rivats in Portugal. Quista bella tarabla datta inavant a bocca til ha inspirà da far landroura 19 disegns. Disegnond til es gnü l'idea dad inventar duos chars e fidels cumpogns pel giuven paur Tiago, nempe il chan Domingo ed il giat Pipoca. Rut Plouda quinta l'istorgia in möd liber ed uschè, cha texts e disegns as cumpletteschan. Quia ün extrat dal cudesch: Güsta cha'ls amis voulan partir, capita alch tuot insolit. Là ingio cha'l pesch es svani cumainza l'aua a's ritschar, a sbarbuogliar ed a bruntular adüna plü dad ot. Ün sbrüun d'aua siglia per ajer sco üna funtana ed üna vusch cloma: Tiago! Tiago, spetta! E lura vezzan Tiago, Pipoca e Domingo ad üna ritscha chi tendscha nan il man vers els. Piglia quista coquiglia, cloma ella a Tiago. Quista coquiglia es ün regal dal mar. Tegn'la adüna pro tai ed ella at güdarà cur cha tü est trist e nu sast plü che tour a man.