Kaleidoskop!
Quist cudesch es ün caleidoscop per indigenas ed indigens, per quels chi han chattà quia lur seguonda patria, per giasts ed amis da la cultura rumantscha. El permetta ün sguard in 90 ons da viver, pensar, sentir e crear i'l muond rumantsch da l'Engiadina. Las bleras fatschettas culuridas da la vita da l'artist e magister Jacques Guidon e da las persunas chi tilan han accumpagnà sun ün purtret persunal plain istorgias e constataziuns fin hoz publichadas be d'inrar.
Dal purtret d'acril cun la vista sül Empire State Building a New York fin pro la legenda davart la destrucziun e reconstrucziun dal cumün Urtatsch i'l 16avel tschientiner: la variaziun e las limitaziuns da la vita in quist spazi natüral extraordinari resortan in purtrets e texts da gronda vigur.
25 persunalitats scrivan davart lur relaziun ed acziun cun Jacques Guidon. Uschè naschan in quist Kaleidoskop adüna darcheu nouvs purtrets e nouvas perspectivas. Uschè variadas e marcantas sco l'Engiadina.