paragraf - Check-in rumantsch
Check-in rumantsch
Bainvegni en il territori rumantsch, nua che la lingua rumantscha vegn vivida e discurrida activamain. Ella è ina porta a la vita sociala en vischnanca, a la cultura ed en il contact cun ils conumans.
Sco persuna novarrivada ta dumondas ti probablamain: Co poss jau emprender rumantsch? Datti dicziunaris online? Nua chat jau litteratura rumantscha per mai e cudeschs auditivs per mes uffants? Sche quai è il cas, lura es ti qua en il dretg lieu. Noss «Check-in rumantsch» dat resposta a questas ed a bleras autras dumondas e ta facilitescha uschia da t’integrar en tia vischnanca.
Nus giavischain a tai bun divertiment da scuvrir tut questas purschidas e d’emprender d’enconuscher la lingua rumantscha!
Tavla da cuntegn
Für alle, die Rätoromanisch (noch) nicht verstehen:
Purschidas per emprender rumantsch
Nossas purschidas da curs per principiantas e principiants permettan in’entschatta simpla e cordiala – senza enconuschientschas preliminaras. Chapescha meglier tia nova patria e ve en discurs cun ils umans en tia vischinanza, saja quai en il temp liber u durant la lavur.
Curs da la Lia Rumantscha
Tuttina sche ti vuls emprender ils emprims pleds u approfundar tias enconuschientschas – la Lia Rumantscha t’accumpogna. Cun in curs online, in curs da la saira u in curs intensiv has ti la pussaivladad d’emprender la lingua rumantscha. E quai a moda flexibla, adattada a tia rutina da mintgadi e cun persunas d’instrucziun versadas.
Ulteriurs curs
Numerusas autras instituziuns porschan curs da lingua per differents nivels. Saja quai en sursilvan, vallader u en in auter idiom – ils curs sa drizzan a tuttas persunas interessadas. E savevas ti ch’intginas vischnancas sustegnan era finanzialmain curs da lingua per persunas novarrivadas? T’infurmescha tar tia vischnanca e chatta in curs adattà en tia vischinanza.
Purschidas per duvrar il rumantsch
Ti has gia visità inqual curs u has gia enconuschientschas dal rumantsch? Lura faschess ina baterlada per rumantsch segir senn. En divers lieus e durant differentas occurrenzas has ti la pussaivladad d’inscuntrar persunas che discurran rumantsch e pos uschia applitgar tia savida.
Café rumantsch
Ils Cafés rumantschs èn in lieu per discurrer rumantsch tant per glieud indigena sco era per persunas ch’emprendan la lingua.
Ils inscunters promovan il barat linguistic e cultural tranter la populaziun locala e las persunas novarrivadas. Nus organisain Cafés rumantschs fisics e virtuals sco era Cafés rumantschs spezials en lieus particulars.
Fieras
Nus essan preschents cun noss products a diversas fieras regiunalas. Questas sentupadas èn ina buna plattafurma per promover il contact cun las Rumantschas ed ils Rumantschs en las regiuns e per formular giavischs ed ideas per promover il rumantsch.
En il center stattan la cussegliaziun professiunala, il barat cultural e la preschentaziun da divers products rumantschs.
e-TANDEM
La metoda da TANDEM po avrir noss orizonts d’emprender. Cuntrari als curs da lingua tradiziunals metta TANDEM il focus sin la communicaziun a bucca.
Duas persunas da differentas linguas furman in TANDEM e mussan ina a l’autra lur lingua. Ellas èn damai a medem temp scolara e scolasta.
chalender.ch
Nua ha il proxim concert, teater u referat rumantsch lieu en tia vischinanza? Dà in sguard sin «chalender.ch» e ti sas dapli.
Questa plattafurma preschenta tut las occurrenzas rumantschas a moda survesaivla e cun la pussaivladad da filtrar ils resultats tenor tes interess e tia regiun.
Meds d'agid
Ultra da curs u baterladas has ti era la chaschun da meglierar tes rumantsch cun leger cudeschs, consumar medias rumantschas, tadlar gieus auditivs u nizzegiar applicaziuns spezialisadas.
Butia
La butia online da la Lia Rumantscha porscha ina gronda selecziun da litteratura per pitschen e grond, cudeschs auditivs u gieus. Tut quai en differents idioms ed en rumantsch grischun.
Uffants e famiglias
Cun kidsfits pon uffants scuvrir la lingua e cultura rumantscha a moda ludica. Noss program da famiglia cumpiglia gieus, cudeschs u filmins – e natiralmain las aventuras da la famiglia Babulin!
TrariTrara
Cun nossa broschura TrariTrara pos ti scuvrir ils avantatgs da la bi- e plurilinguitad. Quella na promova betg mo la communicaziun e las abilitads cognitivas, mabain avra portas, schlargia ils orizonts e rinforza era l’integraziun sociala.
Lingua
Per tes diever da la lingua rumantscha en la vita da mintgadi datti divers sustegns. Il PLEDARI GROND cun access a tut ils idioms ed in program da correctura, l’app dal dicziunari rumantsch per tes telefonin u glossaris tematics.
Uschia tuna il rumantsch
En ils audios da noss «Ein Piccolo dictionnaire RUMANTSCH» pos ti tadlar co che nossa lingua tuna e perfecziunar tia pronunzia.
Ultra da quai chattas ti sin differents products da fatschentas indigenas in code QR. Quel stat per Qualitad Rumantscha – e maina tai a divers baccunets rumantschs per tes mintgadi.
Medias
Saja quai la gasetta, emissiuns da radio u da televisiun: cun far diever da las medias rumantschas es ti al current, pos ta participar a discussiuns ed il medem mument meglierar tias enconuschientschas dal rumantsch.
Fatgs linguistics
Il Grischun è singular. Qua furman il tudestg, il talian ed il rumantsch in dasper l’auter la vita da mintgadi. Il rumantsch cun ses tschintg idioms e la varianta scritta cuminaivla rumantsch grischun è in stgazi cultural plain tun ed istorgia.
Ti vuls savair danunder ch’il rumantsch deriva u tge idiom ch’è per tai il pli prudent d’emprender? Quellas ed anc bleras autras dumondas davart la lingua rumantscha pos ti sclerir en las rubricas sutvart.
| Idioms | Rumantsch Grischun |
| Domenas da diever | Vita Culturala |
| Fatgs | |
Al current cun la Lia Rumantscha
Curs, eveniments u cudeschs novs: la pagina-web da la Lia Rumantscha e noss chanals da las medias socialas gidan tai ad esser al current areguard tut quai che pertutga il rumantsch. I vala la paina da visitar nus regularmain.