paragraf - 10avla sairada grischuna rumantscha
10avla sairada grischuna rumantscha en la Chasa federala
La gruppa parlamentara «lingua e cultura rumantscha» e la Lia Rumantscha han envidà mesemna, ils 17 da december 2025, a la 10avla sairada grischuna rumantscha en la Chasa federala a Berna. En preschientscha dal cusseglier federal Ignazio Cassis ha la gruppa parlamentara beneventà spezialmain il nov president dal Cussegl dals chantuns Stefan Engler, ch’è da lingua rumantscha, ed il nov president dal Cussegl naziunal Pierre-André Page. Tar ina buna buccada – tant culinarica sco era musicala – èn las parlamentarias ed ils parlamentaris ed ils giasts sa baratta:das davart las sfidas actualas da la politica linguistica.
Sin invitaziun da la gruppa parlamentara «lingua e cultura rumantscha» cun ses president cusseglier naziunal Martin Candinas èn passa 100 parlamentari:as e giasts sa raduna:das a l’ediziun da giubileum da la 10avla sairada grischuna rumantscha en la Chasa federala a Berna. Il cusseglier naziunal Martin Candinas ha surdà simbolicamain ina clavina rumantscha als novs presidents da las duas chombras parlamentaras Stefan Engler e Pierre-André Page e plinavant al cusseglier federal Ignazio Cassis. En ses pled ha il cusseglier federal dà in sguard enavos sin ils tschintg onns d’existenza da l’Emna da la lingua rumantscha che dat al rumantsch ina preschientscha sin plaun internaziunal. Urezza Famos, la co-presidenta da la Lia Rumantscha, ha engrazià al parlament per il sustegn ch’il rumantsch dastga retschaiver e dovra er urgentamain.
La finamira da la sairada grischuna rumantscha è da sensibilisar il parlament federal per ils basegns dal rumantsch e per la necessitad da la promoziun da la lingua. Il program ha cumpiglià in bainvegni spezial al nov president dal Cussegl dals chantuns da lingua rumantscha Stefan Engler, divertiment musical dal duo Alexi e Marcus e delicatessas culinaricas cun products regiunals. En il num dal partenari culinaric da la sairada, l’Uniun Parcs grischuns, ha la cussegliera naziunala Anna Giacometti drizzà pleds da salid als giasts.
Davart la gruppa parlamentara «lingua e cultura rumantscha»
La gruppa parlamentara «lingua e cultura rumantscha» è vegnida fundada il 2013 a chaschun dal giubileum da 75 onns rumantsch sco lingua naziunala. Ella ha actualmain radund 80 commembras e commembers e vegn presidiada dal cusseglier naziunal Martin Candinas. Il secretariat da la gruppa parlamentara maina la Lia Rumantscha.
Impressiuns
© Lia Rumantscha / Monika Flückiger
