paragraf - Bunas notas ed intginas recumandaziuns per la Lia Rumantscha
Bunas notas ed intginas recumandaziuns per la Lia Rumantscha
L'Uffizi federal da cultura ha publitgà ils 10 d'avust l'evaluaziun da la SAS Grischun davart la promoziun dal rumantsch e talian. Quest studi duai mussar, sche las purschidas da la Lia Rumantscha (e da la Pro Grigioni Italiano) correspundian als basegns da la populaziun.
Il rapport conferma in'auta qualitad da las prestaziuns da la Lia Rumantscha ed in niz renconuschì vastamain. Quai vala surtut per servetschs sco translaziuns, cussegliaziuns, dicziunaris e curs da lingua. Plinavant constatescha el che la Lia Rumantscha ha professiunalisà sia moda da lavurar e sias novas purschidas.
En pli vesa il rapport era potenzial da rinforzar la visibilitad da la Lia Rumantscha e sia rolla sco «conscienza rumantscha», da sviluppar vinavant sia promoziun da lingua digitala e da pledentar meglier giuvenils en la diaspora.
La recumandaziun centrala da rinforzar la definiziun da las gruppas en mira e da schlargiar l'irradiaziun da sias activitads ha la Lia Rumantscha gia resguardà en il curs strategic actual. Impurtant en quest connex è era la constataziun che las activitads da l‘organisaziun vegnan limitadas en emprima lingia pervia da las finanzas restrenschidas.