paragraf - Chasper Sarott nov president da la Lia Rumantscha
Chasper Sarott nov president da la Lia Rumantscha
Sonda, ils 20 da zercladur 2026, ha gì lieu a Samedan la radunanza da delegadas e delegads da la Lia Rumantscha. In dals puncts impurtants è stada l’elecziun substitutiva dal presidi da la LR. Las delegadas ed ils delegads han elegì Chasper Sarott sco nov president da la LR.
98 delegadas e delegads sco era giasts stad:as en stad:as preschent:as a la radunanza da la LR a Samedan. Ella ha gì lieu en preschientscha da Gian Reto Melchior, represchentant da la vischnanca da Samedan, ed il cusseglier guvernativ Jon Domenic Parolini.
Elecziuns
Cun 47 da 49 vuschs valaivlas è Chasper Sarott vegni elegì sco nov president da la LR. A partir dad immediat succeda el ad Urezza Famos, l'anteriura copresidenta. Dapi l’onn 2022 ha ella presidià l’organisaziun ensemen cun Gianna Luzio che ha demissiunà l’atun 2025.
Chasper Sarott da Sent ha lavurà sco diplomat ed ambassadur en differents pajais sco il Libanon, la Pologna, il Madagascar e la Republica democratica dal Congo. Dapi l’onn passà è Chasper Sarott vicedirectur e schef dal persunal dal Departament federal dals affars exteriurs (DFAE).