paragraf - Di dal plurilinguissem 2026
«Di dal plurilinguissem» en il parlament
Ils 24 da settember vegn festivà per l'otgavla giada il «Di dal plurilinguissem» en il parlament a Berna. La finamira da quest di è da promover il barat e la chapientscha tranter las differentas cuminanzas linguisticas e da mussar la ritgezza linguistica e culturala da la Svizra.
Durant quest di èn las parlamentarias ed ils parlamentaris da las chombras federalas envidads da s'exprimer durant in entir di en in'autra lingua che lur atgna e da deditgar attenziun speziala a las linguas minoritaras rumantsch e talian.
La Svizra respunda
A chaschun da l'otgavel «Di dal plurilinguissem» han ins producì tschintg videos curts cun il sustegn amiaivel d'intginas parlamentarias e d'inqual parlamentari. En quels partan ellas ed els, ina giada a moda seriusa, ina giada cun umor, experientschas persunalas, regurdientschas ed anecdotas en connex cun nossas linguas naziunalas e la plurilinguitad da noss pajais.
Participà han las suandantas politicras ed ils suandants politichers: Anna Giacometti, Anna Rosenwasser, Daniel Ruch, Greta Ilaria Gysin, Laurence Fehlmann-Rielle, Laurent Wehrli, Martin Candinas, Matthias Michel, Philipp Kutter, Samira Marti e Sibel Arslan.
Il project vul render visibla la diversitad linguistica e culturala da la Svizra a maun da rapports davart las experientschas persunalas. El mussa che las linguas èn colliadas stretgamain cun experientschas individualas, cun regurdientschas e cun il mintgadi ed accentuescha uschia lur vart emoziunala.
Promovida vegn quest’acziun da las suandantas instituziuns: Helvetia Latina sco era las gruppas parlamentaras «ITALIANITÀ», «Plurilinguitad CH» e «Lingua e cultura rumantscha», che vegn presidiada dal cusseglier naziunal Martin Candinas. La Lia Rumantscha en sia funcziun sco secretariat da la gruppa parlamentara ha cunorganisà il «Di dal plurilinguissem».