paragraf - festival travers zuoz
festival travers zuoz
Dals 12 fin ils 14 da settember 2025 ha lieu il segund festival da teater rumantsch «festival travers zuoz». Il punct culminant dal program è la premiera dal nov toc da teater «Bab, siu archiv ed jeu» dad Asa Hendry. Ils trais iniziants da l'uniun travers, la vischnanca da Zuoz, il Lyceum Alpinum e la Lia Rumantscha, sa legran dal program multifar che reflectescha e preschenta la scena da teater rumantscha fitg dinamica.
Il toc da teater «Bab, siu archiv ed jeu», undrà cun il «premi travers zuoz 2024», stat en il center dal festival. Reschia maina Rebekka Bangerter, ina giuvna reschissura che ha gia fatg numerusas inscenaziuns en teaters renumads ed en la scena libra. Per il maletg da tribuna e la glisch procura Lukas Sander, la direcziun musicala surpiglia Dominic Röthlisberg. Asa Hendry e la Zuozingra Selina Beghetto accumpognan las emprovas dramaturgicamain. Sin tribuna stattan l'actur samedrin Lorenzo Polin, ils dus acturs laics Bistgaun Capaul da Lumbrein e Lorin Könz da Guarda. Tuts trais discurran lur idiom: puter, sursilvan e vallader. Els vegnan accumpagnads d'in chor viril ad hoc che sa cumpona da commembers dal Cor masdo Zuoz e dal Cor viril Guarda Val. Il toc vegn mussà cun surtitels tudestgs.
Program accumpagnant
Sper las trais represchentaziuns principalas preschenta il festival puspè in program accumpagnant fitg ritg. Il festival cumenza cun ina producziun da teater per giuvenils dal Lyceum Alpinum Zuoz. L'emprima represchentaziun è exclusivamain per scolar:as da la val, suenter ha lieu ina represchentaziun publica en la chasa da scola primara a Zuoz. «New World» è in toc da teater scrit da l'autura giuvna Nadine Hosang, translatà en puter dad Andrea Urech. Il toc tracta la dumonda co che noss avegnir pudess vesair or. A moda captivanta ballantscha il toc tranter utopia e distopia e sveglia numerusas dumondas actualas davart il mund dad oz.
Sco segund punct dal program accumpagnant vegn mussada la «opera da café» rumantscha «Las secretezzas di Susanna» producida da l'Opera Engiadina en collavuraziun cun la Camerata Puntraschigna. L'opera ha gì grond success l'onn passà. Da la partida èn Sara-Bigna Janett (sopran), Flurin Caduff (bariton) e Daniel Badilatti (rolla mitta dal servitur). Reschia maina Riikka Läser.
Novs formats
Il festival introducescha dus novs formats: il café travers e la bar da teater. En il café travers vegn discurrì la sonda avantmezdi tranter auter da la genesa dal toc da teater «Bab, siu archiv ed jeu», davart l'influenza dal teater popular en la lavur da teater professiunala sco era davart il scriver scenic per rumantsch u en autras linguas. En la bar sa scuntran giasts envidads e spontans sonda saira per l'open mic. Dumengia avant la derniera da la producziun principala vegnan chantadas sut la batgetta da Curdin Lansel chanzuns rumantschas e semperverds ensemen cun il chor viril ad hoc. Dal rest vegn il public adina puspè surprais cun intervenziuns dal duo da clowns Aniko (Annina Sedlacek e Nicolas Stocker).