paragraf - Il proxim pass per definir il futur cuminaivel
Il proxim pass per definir il futur cuminaivel
Ils 15 d’avrigl 2025, èn las presidentas ed ils presidents da las uniuns affiliadas da la Lia Rumantscha (Cussegl da la Lia Rumantscha) s’inscuntrads a Cuira per in lavuratori: La suprastanza da la Lia Rumantscha ha envidà a discutar in maletg per il futur da la Lia e la cuminanza rumantscha. Davart ils resultats da quest process participativ orientescha la Lia Rumantscha a la radunanza da delegadas e delegads ils 21 da zercladur a Turitg.
Per la suprastanza da la Lia Rumantscha èsi in mument ideal per instradar proxims pass: Ella lavura dapi quest onn en ina nova constellaziun, cun trais novas persunas. Ensemen cun il secretari general Markus Solinger ch’è entrà en uffizi avant in onn e mez han gia pudì vegnir instradadas numerusas midadas internas. Quest process ha manà a resultats positivs, pussibilitond ina renovaziun e modernisaziun necessaria. Sut il copresidi cumprovà dad Urezza Famos e Gianna Luzio ha la suprastanza evaluà ils ultims mais necessitads ed opziuns da svilup per l’organisaziun tetgala dal rumantsch. Ensemen cun las uniuns affiliadas e tut las forzas engaschadas per il rumantsch vul la suprastanza cuntinuar la via enchaminada ed explorar intginas novaziuns strategicas per ils proxims onns.