paragraf - Il sursilvan en il Pledari Grond
Il sursilvan en il Pledari Grond
Suenter in project da plirs onns lavur d’adattaziun dal «Lexicon Romontsch Cumparativ» dad Alexi Decurtins èsi finalmain uschè lunsch: er il stgazi da pleds sursilvan è integrà en il Pledari Grond. Cun quest pass meglierescha la plattafurma da dicziunaris las pussaivladads da tgirar, intermediar e duvrar nossa lingua en il mintgadi – en plirs idioms ed en rumantsch grischun.
Ina lavur cun forzas unidas
Ina gruppa da linguist:as sursilvan:as ha elavurà en collavuraziun las numerusas datas linguisticas dad A fin Z, las ha preparà ed adattà, per las pudair implementar en il Pledari Grond online. Per la programmaziun ha la Lia Rumantscha collavurà stretgamain cun la firma far.ch.
Il transfer da datas linguisticas da la furma stampada a la furma digitala dal Pledari Grond ha pretendì da reorganisar las datas. Durant quest process n'èn naginas datas linguisticas idas a perder. Las infurmaziuns supplementaras pli detagliadas restan visiblas davos las culissas.
Programs da curreger
Da nov stattan era a disposiziun sis «spellcheckers» – programs per curreger texts scrits cun il computer: in per mintga idiom ed il rumantsch grischun. Ils utensils èn disponibels per Microsoft Word e divers auters programs, sco era en ina versiun web sin pledarigrond.ch. Il project è vegnì sustegnì finanzialmain da l’Uffizi federal da cultura e dal chantun Grischun e realisà da la firma far.ch cun l’agid da la partiziun Lingua da la Lia Rumantscha.
La lavur cuntinuescha – en cuminanza
Il «Lexicon Romontsch Cumparativ» – la basa da datas linguisticas per il sursilvan, utilisada e transferida actualmain en il Pledari Grond – è cumparì l’onn 2012. Igl è perquai evident che visitad:ras na chattan anc betg in u l’auter pled pli nov u intgins neologissems.
La partiziun Lingua da la Lia Rumantscha vegn er a rediger pass per pass ils pleds existents e cumplettar cuntinuadamain il stgazi da pleds e prenda gugent en consegna propostas da pleds sursilvans mancants. Quai vala dal rest era per ils auters idioms.
Il vocabularisursilvan.ch – fin ussa l’unic dicziunari online per il sursilvan – resta accessibel era vinavant. La Lia Rumantscha vegn ad observar il traffic da visitad:ras ed a reagir tenor basegn.