paragraf - Ina decisiun a favur dal service public
Ina decisiun a favur dal service public
La decisiun dal suveran cunter l'iniziativa «200 francs bastan!» è per las Rumantschas ed ils Rumantschs da gronda impurtanza. La lingua rumantscha dovra ina preschientscha mediala per restar visibla en tut la Svizra. Be in ferm service public ed ina rapportaziun regulara da Radiotelevisiun Svizra Rumantscha en las regiuns garantescha questa preschientscha.
La decisiun è medemamain impurtanta per la coesiun svizra, per la chapientscha vicendaivla tranter las parts dal pajais sco per la plazza da medias svizra. Da quai profita per finir l'entira populaziun.
Sfidas futuras
Era sche las votantas ed ils votants han refusà l'iniziativa, stat la SRG SRR pervia da las mesiras gia concludidas davant gronds sforzs da spargnar. Quels pretendan dentant reducziuns tar il service public. Grazia a la taxa da Serafe da 335 francs ad onn – ella vegn reducida pass per pass sin 300 francs fin il 2029 – è il service public medial multifar da la SRG SSR tuttina garantì.
Markus Solinger, secretari general da la Lia Rumantscha: «Il NA a l'iniziativa oblighescha la SRG SSR da restar preschenta en las regiuns e da porscher ina rapportaziun d'auta qualitad en tut las quatter linguas svizras.»
La Lia Rumantscha s'engascha vinavant per garantir la diversitad linguistica ed il provediment da basa en
tut las linguas svizras a moda persistenta.