paragraf - In nov record da participaziun
Plima d’aur/Pledpierla – in nov record da participaziun
La concurrenza da scriver Plima d’aur/Pledpierla, che la Lia Rumantscha ha realisà quest onn cun ils dus temas «la clav magica» e «mes planet fantastic», ha purtà in nov record da participaziun:
602 texts en tut ils idioms e rumantsch grischun èn vegnids inoltrads en las regiuns Engiadina, Grischun Central e Surselva. Las trais giurias han ussa legì e giuditgà ils texts.
Dapi passa 25 onns organisescha la Lia Rumantscha la concurrenza da scriver Plima d’aur/Pledpierla ed animescha uschia uffants e giuvenils da scriver rumantsch. En il decurs da las davosas emnas han las trais giurias regiunalas tschernì ils megliers texts da las 602 contribuziuns inoltradas.
Premiaziun
Per la premiaziun s’inscuntran las participantas ed ils participants da tut las regiuns virtualmain. Las giurias preschentan las victuras ed ils victurs e laschan preleger da mintga regiun in text victur. Questa premiaziun virtuala ha lieu mesemna, ils 4 da zercladur 2025, da las 10.15 a las 11.00.
La surdada dals premis ha silsuenter lieu en mintga regiun:
Engiadina
4-6-2025, a las 17.00, en il Chastè Planta-Wildenberg, Parc Naziunal Svizzer, Zernez
Surselva
4-6-2025, a las 17.00, en la «sala dil luvratori communal», Castrisch
Grischun Central
4-6-2025, a las 17.00, en la sala Gelgia da l’Hotel Gelgia, Casti
Durant questa occurrenza vegn la giuria ad esser preschenta ed a preleger las laudatios. Las victuras ed ils victurs survegnan in premi en furma da daners ed in regal da la Lia Rumantscha.
Cun «la clav magica» e «mes planet fantastic» als «Dis da litteratura 2025»
Dapi blers onns collavurescha la Lia Rumantscha cun il comité d’organisaziun dals «Dis da litteratura». Ils «Dis da litteratura» han lieu il 1. ed ils 2 da november 2025 en la Postremise a Cuira. Las prelecziuns dals texts da la Plima d’aur/Pledpierla èn prevesidas per sonda, ils 1. da november. La Lia Rumantscha ha grond plaschair da pudair porscher a la nova generaziun d’autur:as ina gronda tribuna ed in auditori interessà.