paragraf - Nova ediziun: «Ina pitschna miracla da Nadal»
«Ina pitschna miracla da Nadal» – ina nova ediziun per l'entira famiglia
Punctualmain per il temp d'advent cumpara in nov cudesch illustrà per uffants: «Ina pitschna miracla da Nadal». L'istorgia, che tematisescha plain empatia e cun bler umor la schigliusia e l'amur tranter fragliuns, sa basa sin l'original englais «The Empty Stocking» dal renumà autur Richard Curtis e cuntegna bellezza maletgs en colur da l'illustratura Rebecca Cobb.
Igl è curt avant Nadal e las schumellinas Sam e Charlie èn vaira agitadas. Sco adina è Sam stada ina fitg brava quest onn – e Charlie? Ma bain, per dir la vardad: Charlie è stada vaira sfarfatga. Betg propi nauscha, ma ina VERITABLA LUMPAZZA. Tgi sa, sch’ella survegn almain in sulet regal? Mintgatant (fitg darar) sto Santa esser dir. Ed inqual giadas (vairamain mo mintga quattertempras) fa schizunt el in sbagl ...
In cudesch per l'entira famiglia
Cun l'istorgia da Nadal edescha la Lia Rumantscha quest onn in cudesch da l'enconuschent autur e scenarist Richard Curtis. «Ina pitschna miracla da Nadal» envida cun fin umor, blera empatia ed in messadi impurtant da s'approfundar en in'istorgia plain tensiun che tracta la schigliusia e l'amur tranter fragliuns a moda charina e divertenta. Il cudesch cun ils grondius maletgs en colur da l'illustratura Rebecca Cobb lascha sfundrar en in auter mund cultural e permetta uschia era da tematisar las differentas tradiziuns da Nadal: qua na porta numnadamain betg il bambin ils regals da Nadal, sco tar nus, mabain Santa. Cun bucca averta ed egls traglischants pon las lecturas ed ils lecturs giuvens suandar l'istorgia da las duas schumellinas Sam e Charlie e lur aventura cun Santa.
L'ediziun da Nadal na sa distingua betg mo tras sia istorgia che va a cor, mabain intganta era cun sia grafica nunconvenziunala: las scrittiras grondas e pitschnas fan numnadamain sigls e cupitgolas tras il cudesch. L'istorgia animescha pitschen e grond da rir, reflectar e discutar.
Il cudesch lià «Ina pitschna miracla da Nadal» cumpara en tut ils idioms ed en rumantsch grischun e custa CHF 25.00. El po vegnir retratg a partir d'immediat en la butia online da la Lia Rumantscha, via telefon 081 258 32 22 u en las librarias.
Vernissascha en la libraria Lüthy a Cuira
Ils 27 da november 2025 a las 17.00 raquintan Nadja e Michel Estermann la nova istorgia da Nadal cun pleds e musica en la libraria Lüthy a Cuira. L’entrada è gratuita ed i dat ina pitschna marenda.