paragraf - Nova ediziun - Jau sun tes cudesch...
Nova ediziun: «Jau sun tes cudesch, ma deliberescha!»
La Lia Rumantscha sa legra da preschentar in nov cudesch per lecturas giuvnas e lecturs giuvens: «Jau sun tes cudesch, ma deliberescha!» cuntegna quatter istorgias da comic en differents stgalims da leger e cumpara en tut ils idioms ed en rumantsch grischun.
Adatg da quest cudesch! El è giagliard, nunditg divertent ed ha duns extraordinaris. Il cudesch fa sco sch’i na fiss nagut, ma dapi ch’el è qua capitan trasora chaussas curiusas en scola. Lina, Curdin ed ils auters uffants han tuttenina las pli legras lecziuns dal mund. Il cudesch als gida en scola, el fa ina filistucca suenter l’autra ed el sa bunamain tut. Per exempel: sajettar puncts dad i en il nas dals scolasts, dar ballape durant la pausa e schizunt tentar las schimgias dal zoo.
Istorgias da comic cun nivel creschent
«Jau sun tes cudesch, ma deliberescha!» da l’autura renumada Katja Frixe cumpiglia quatter istorgias en differents stgalims da leger. Cun mintga istorgia s’augmentan la quantitad da text ed il grad da difficultad. Sustegnì visualmain vegn il cuntegn da las illustraziuns umoristicas da Tine Schulz. La figura principala è e resta il cudesch sez che accumpogna ils uffants durant lur lectura, discurra cun els e lavura cun els interactivamain. Per exempel animescha el da sa mover, rir e lignar u motivescha da cuntinuar cun la lectura. La Lia Rumantscha ha translatà il cudesch da la chasa editura Arena en tut ils idioms ed en rumantsch grischun ed edescha el en sis variantas. El fa part dal program per famiglias kidsfits che gida a promover il rumantsch tar uffants.
L’ediziun liada «Jau sun tes cudesch, ma deliberescha!» cumpara en tut ils idioms ed en rumantsch grischun e custa CHF 25.00. Il cudesch po vegnir retratg a partir d’immediat en la butia online da la Lia Rumantscha sin www.liarumantscha.ch, via telefon 081 258 32 22 u en las librarias.