paragraf - Reintroducziun dals Cafés rumantschs a Savognin e Casti
Reintroducziun dals Cafés rumantschs a Savognin e Casti
La Lia Rumantscha organisescha danovamain Cafés rumantschs en il Grischun Central. Quels han lieu alternant a Savognin e Casti – e quai mintgamai il davos mardi dal mais da las 16.00 a las 17.00. L'emprim da quels Cafés rumantschs vegn lantschà ils 27 da schaner 2026 a Casti. Giast al Café rumantsch è Marietta Cathomas, linguista tar Radiotelevisiun Svizra Rumantscha.
Ils Cafés rumantschs en il Surmeir han gì premiera avant 13 onns a Savognin, iniziads da Carmen Caspar, da lez temp promotura regiunala: «Cura ch'jau hai cumenzà mia lavur tar la Lia Rumantscha, avev'jau pensà ch'i fiss bel sche giasts ed indigens avessan in lieu per s'inscuntrar e discutar per uschia promover la lingua rumantscha». Quests Cafés rumantschs han gì grond success fin tar la pandemia da corona. «Durant ils curs da rumantsch ch'jau instruesch sco magistra, èsi adina puspè vegni remartgà che las pussaivladads da discurrer surmiran manchian», raquinta Simona Demarmels, promotura regiunala da la Lia Rumantscha. Ella surpiglia da nov l'organisaziun dals Cafés rumantschs a Savognin e Casti. Ils inscunters duain crear in spazi avert per tuttas e tuts che han plaschair ed interess da la lingua e cultura, da l'art e da la politica.
Ils Cafés rumantschs èn in lieu per discurrer rumantsch tant per glieud indigena sco era per persunas che emprendan la lingua. Els promovan il barat linguistic e cultural tranter la populaziun locala e las persunas novarrivadas. Mintga entupada ha in tema e tut tenor vegn er envidà in giast.
Café rumantsch a Casti
en l'Hotel Alvra & Gelgia
da las 16.00 a las 17.00
datas: 27-1-2026 / 31-3-2026 / 26-5-2026
Café rumantsch a Savognin
en il Café Casparin
da las 16.00 a las 17.00
datas: 24-2-2026 / 28-4-2026 / 30-6-2026