paragraf - In NA – a favur da la lingua rumantscha
In NA – a favur da la lingua rumantscha
Sco organisaziun tetgala per la promoziun dal rumantsch refusescha la Lia Rumantscha cleramain l'iniziativa federala «200 francs bastan!». La raschuns principalas da questa opposiziun èn:
Damain visibilitad per il rumantsch
In gea a l'iniziativa indebliss RTR e restrenschess per consequenza era la rapportaziun rumantscha. Surtut per ina lingua che vegn discurrida be da paucas persunas fiss questa perdita da visibilitad enorm dolurusa.
La pretaisa che las chasas da medias privatas vegnian a cumplettar las largias n'è ord vista medial-economica betg acceptabla. Talas investiziuns na rendan simplamain betg.
Ina tribuna per la cultura rumantscha
Ina chasa da medias indeblida avess ultra da quai consequenzas fatalas per las persunas activas sin il champ cultural. Gist per ellas è la visibilitad essenziala. Ils davos decennis ha RTR registrà, emess ed archivà numerus concerts da chor, d'orchester u da gruppas da hip-hop. Ina chasa da medias indeblida vegn strusch pli a pudair far talas registraziuns e producziuns en l'avegnir.
Spezialmain pertutgada fiss la generaziun giuvna: Suenter in gea a l'iniziativa scrudass ina gronda part da sia promoziun. Artist:as giuv:nas avessan pia cleramain damain schanzas da vegnir udi:das e percepi:das.
Lingua, chapientscha vicendaivla e coesiun
Per la Svizra cun sias quatter linguas è la communicaziun tranter las regiuns linguisticas da grond'impurtanza. Ina reducziun massiva dals meds finanzials da la SRG SSR periclitass questa chapientscha vicendaivla considerablamain – ed indebliss per finir era nossa democrazia directa.
Surtut oz, en in temp da crisas geopoliticas e da guerras, da fake news e da consequenzas imprevisiblas da l'intelligenza artifiziala, sto in tal svilup vegnir franà.
Ristgas d'investiziuns centralisadas
In gea a l'iniziativa sfurzass la SRG SSR da centralisar pli ferm sias investiziuns, probablamain a Turitg-Leutschenbach, cun consequenzas negativas per Cuira e per la rapportaziun en las regiuns perifericas.
Surtut na fiss ina rait da schurnalist:as en l'Engiadina, en la Surselva u en il Grischun Central uschia betg pli finanziabla. Ma questa rait è indispensabla per ina rapportaziun rumantscha credibla e d'auta qualitad.
In NA – a favur da la lingua rumantscha
L'iniziativa federala «200 francs bastan!» periclitescha la substanza da la lingua e cultura rumantscha. Per ina lingua, che vegn discurrida dad uschè paucas persunas, fiss il donn immens.
La Lia Rumantscha di cler e net NA a l'iniziativa.