Champ da stad 2026 | Lia Rumantscha

Cun sustegn da l'Uffizi federal da cultura UFC organisescha la Lia Rumantscha la stad 2026 in proxim Champ da stad. Il champ sa drizza ad uffants che vivan ordaifer il territori linguistic rumantsch tradiziunal sco er ad uffants da las valladas rumantschas en il Grischun. Premissa per la participaziun è ina chapientscha da basa dal rumantsch.

Il Champ da stad porscha ad uffants la pussaivladad d'emprender rumantsch en il territori tradiziunal rumantsch en in ambient famigliar e ludic. Durant in'emna èn ils uffants en contact intensiv cun la lingua grazia ad activitads multifaras sco gieus, lavuratoris, excursiuns, projects creativs u activitads sportivas. Tut il program ha lieu en lingua rumantscha, quest onn oravant tut en vallader e puter. Las manadras ed ils manaders dal Champ da stad sustegnan er ils uffants che discurran auters idioms e garanteschan ch'els pon suandar las instrucziuns.

Il Champ da stad n'è betg in'instrucziun da scola classica. Ils uffants duain duvrar a moda ludica la lingua, ed ils dis en il territori rumantsch tradiziunal duessan svegliar il plaschair vi da la lingua e cultura rumantscha. Il Champ da stad promova ultra da quai las cumpetenzas socialas, rinforza l'identificaziun cun la cultura rumantscha e stgaffescha spazis per inscunters cun persunas da la medema vegliadetgna che discurran la medema lingua. 
 

Infos ed annunzia

Lieu
Chesa Quattervals a S-chanf, Via Maistra 105, 7525 S-chanf
Qua chattais Vus dapli infurmaziuns davart l'alloschi.

Data
25 – 31 da fanadur 2026

Arrivada
Ils 25 da fanadur a partir da las 12.00. Cun accumpagnament d'ina persuna creschida pon ils uffants era viagiar cuminaivlamain da Cuira a S-chanf. Infurmaziuns detagliadas suondan.

Partenza
Ils 31 da fanadur 2026 a partir da las 12.00. Ils uffants pon puspè viagiar cuminaivlamain a Cuira. Infurmaziuns suondan.  
Ils custs per ils viadis Cuira – S-chanf surpiglian ils:las autorisa:das d'educar. 

Vegliadetgna
7 fin 16 onns (senza ils:las autorisa:das d'educar)

Manad:ras
Pascal Schmidt e Patric Wichert (manaders dal champ), Regula Tuor (cuschiniera dal champ), 3 assistent:as

Custs
CHF 450.– per uffant. A partir da dus uffants muntan ils custs a CHF 400.– per uffant.

Annunzia
Fin ils 31 da matg 2026 via formular.

Assicuranza
L'assicuranza è chaussa dal:as participant:as.Ulteriuras infurmaziuns davart il program e l'arrivada survegnis Vus suenter l'annunzia. Sche Vus avais remartgas u dumondas pudais Vus gugent s'annunziar per e-mail a luisa.cadonau@rumantsch.ch.